దివ్యాంగులకుపెళ్లిళ్లు చేస్తాం

దివ్యాంగులంటే అందరికీ చిన్నచూపే... ఇక వారికి పెళ్లి చేయాలంటే తల్లిదండ్రులకు ఎంత కష్టమో చెప్పక్కర్లేదు. సంబంధాలు చూసిచూసి విసిగిపోయేవారు ఎంతోమంది ఉంటారు. అలాంటివారికి ఉచితంగా పెళ్లిళ్లు చేస్తోంది గుంటూరుకు చెందిన వల్లభాపురం నాగశ్రీ. ఆ విశేషాలు ఆమె మాటల్లోనే...

నాకు రెండేళ్లప్పుడు ఎడమకాలికి పోలియో వచ్చింది. ఐదు నిమిషాలకు మించి నిలబడలేను. ఎక్కడికి వెళ్లాలన్నా ఎవరో ఒకరు సాయపడాలి. కొంతమంది స్నేహితులు నాకు సహకరిస్తే మరికొందరు నానా మాటలనేవారు. వీటన్నింటితో నాలో నేను కుమిలిపోయేదాన్ని. ఏడో తరగతిలో మా ప్రిన్సిపల్‌ మాటలతో ఆత్మస్థైర్యం వచ్చింది. కొన్నేళ్లకు వెంకట సురేష్‌ అనే వ్యక్తితో పరిచయం ఏర్పడింది. పెళ్లి చేసుకోవాలనుకున్నాం. నేను దివ్యాంగురాలినని వాళ్లింట్లో ఒప్పుకోలేదు. దీంతో విజయవాడ కనకదుర్గమ్మ గుడిలో పెళ్లి చేసుకున్నాం. నా స్నేహితురాలు కల్పనకు ప్రమాదవశాత్తు కుడి చేతి వేళ్లు వంగిపోయి, అతుక్కుపోయాయి. ఆమె తల్లిదండ్రులు తన పెళ్లి చేయడానికీ నానా కష్టాలు పడ్డారు. కల్పన ఇష్టపడిన వ్యక్తితో మేమే దగ్గరుండి పెళ్లి చేశాం.

వారి కష్టాలు చూసి... మేం జీవనోపాధి కోసం గుంటూరు ఎన్టీఆర్‌ బస్టాండ్‌లో ఓ దుకాణం నిర్వహించేవాళ్లం. అక్కడ ఎన్నో ఇబ్బందులు పడుతూ రాకపోకలు సాగించే దివ్యాంగులను చూశా. వారికి చేతనైన సహాయం చేసేదాన్ని. ఆ సమయంలోనే నాకు ఆరోగ్యం అనే మరగుజ్జు పరిచయమైంది. తన కష్టాలు తెలుసుకొని వినుకొండకు చెందిన శివతో పెళ్లి చేశా. క్రమంగా మాకు తెలిసిన దివ్యాంగులకు వివాహాలు చేయడం మొదలుపెట్టాం. వైకల్యం ఉన్నవారిని పెళ్లి చేసుకోవడానికి ఎవరూ ముందుకు రారు. ఇలా కొందరు పెళ్లికాక, సమాజంలోకి రాలేక మానసికంగా కుంగిపోతుంటారు. కుటుంబాన్ని వదిలి తమ బతుకేదో తామే బతుకుదామని నిర్ణయించుకుంటారు. మరికొందరు ఆత్మహత్యలు చేసుకుంటారు. అలాంటి వారికి జీవితంపై ఆశ కలిగించాలని నా భర్త, నేను నిర్ణయించుకున్నాం. కొంతమంది స్నేహితులతో కలిసి 2018లో దివ్యాంగుల వివాహఇన్ఫో సొసైటీ ఏర్పాటు చేశాం. పెళ్లి కాని దివ్యాంగులతో ఓ వాట్సాప్‌ గ్రూప్‌ ఏర్పాటు చేశాం. వివాహ పరిచయ వేదికలూ నిర్వహిస్తున్నాం. ఇరువైపులా ఒప్పుకున్న తరువాత వారి కుటుంబ, ఆర్థిక పరిస్థితులను పరిశీలిస్తాం. ఒకే రకమైన లోపం ఉన్నవారు పెళ్లి చేసుకుందామని ఒప్పుకున్నా వాళ్ల తల్లిదండ్రులు వద్దంటారు. అలాంటివారికి కౌన్సెలింగ్‌ ఇస్తాం. ఇంకొందరు భార్యాభర్తలిద్దరూ దివ్యాంగులైతే అలాంటివారే పుడతారని భయపెడుతుంటారు. అలాంటి సందేహాలకు సమాధానాలిస్తాం. సరైన వివరాలు తెలుసుకున్నాక ఒక రోజు అందరికీ సామూహిక వివాహాలు చేస్తాం. ఇప్పటి వరకు మొత్తం 35 పెళ్లిళ్లు చేశాం. కొంతమంది దాతలు సాయం చేస్తుంటారు. వివాహం జరిగే రోజునే ప్రభుత్వం ఇచ్చే వివాహ ప్రోత్సాహక పథకంలో నమోదు చేయిస్తాం. పెళ్లైన తరువాత ఏవైనా ఇబ్బందులు ఏర్పడినా సొసైటీలో కౌన్సెలింగ్‌ ఇస్తాం. ఏ తోడు దొరకదనుకుని భావించేవారు పెళ్లై సంతోషంగా జీవించడం చూస్తుంటే ఆనందంగా అనిపిస్తుంది.

- కౌతవరపు సత్యప్రసాద్‌, ఈనాడు డిజిటల్‌ గుంటూరు

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి