బతుకునిచ్చాయని... మరచిపోరాదని!

మూలాలను మర్చిపోకపోవడం అంటే ఇదే... మనం ఎంచుకున్న వృత్తి మనకు ఆర్థికంగా, వ్యక్తిగతంగా సమాజంలో గుర్తింపు తీసుకువస్తే దానికి కృతజ్ఞత చూపే వాళ్లెంతమంది? తమకు గుర్తింపునిచ్చిన వృత్తికి కృతజ్ఞతగా వీరు ఏంచేశారో చూడండి.
పాత ట్రాక్టర్లు ఆయనకు దైవంతో సమానం. వాటిని కొని అమ్మడం ద్వారా ఆర్థికంగా స్థిరపడ్డ పాటిబండ్ల శ్రీరామ్మూర్తికి అవంటే ఎంతో భక్తి. దానికి గుర్తుగా తన మూడు అంతస్తుల భవంనంపై ఓ ట్రాక్టర్‌నే పెట్టేశారాయన. అంతెత్తుకు ట్రాక్టరు ఎలా ఎక్కించారా అని ఆశ్చర్యపోకండి. నమూనాను సిమెంటుతో చేయించి దానికి పాత ట్రాక్టరు సామగ్రి తెచ్చి పెట్టి అచ్చుగుద్దినట్లు నిజమైన దానిలా తయారుచేశారు. ఖర్చుకు వెనకాడకుండా 12సంవత్సరాల క్రితమే ఇలా ఏర్పాటు చేశారాయన. ఇంతకీ ఈయనది కృష్ణాజిల్లా యనమలకుదురు.

1972లో తన తండ్రి స్థాపించిన అరుణ ఫొటోస్టుడియో మీదే ఆధారపడి ఉన్నతస్థితికి చేరామని దానికి గుర్తుగా ఆ కెమెరాను జీవితాంతం గుర్తుండేలా భవనంపై పెట్టాలి అనుకున్నారు కృష్ణాజిల్లా పెడనకు చెందిన నాదెళ్ల కోటేశ్వర్రావు. దీని ఆకృతిని, పరిమాణాన్ని తానే తాపీమేస్త్రికి అందజేసి, నాలుగు నెలలు శ్రమపడి ఇలా 16 అడుగుల భారీ కెమెరా రూపాన్ని ఇంటిపై ప్రతిష్ఠించారు. దీని నిర్మాణం కోసం ఇంటి గృహప్రవేశ తేదీని సైతం వాయిదా వేశారంటే ఆయన సంకల్పం ఎంత గట్టిదో అర్థమవుతుంది. నికాన్‌ కంపెనీ భారతదేశం సిఇఓ ఫోన్‌ చేసి దానిని ఎలా రూపొందించారని అడిగి తెలుసుకుని అభినందించారట.