Lahore Blast: లాహోర్‌లో శక్తిమంతమైన పేలుడు.. ముగ్గురి మృతి

ఇస్లామాబాద్‌: పాకిస్థాన్‌లోని లాహోర్‌లో గురువారం శక్తిమంతమైన బాంబు పేలుడు చోటుచేసుకుంది. ఈ ఘటనలో ముగ్గురు మృతి చెందగా, దాదాపు 20 మందికి పైగా గాయపడ్డారు. ఇక్కడి ప్రసిద్ధ అనార్కలి మార్కెట్‌లోని పాన్‌ మండీ వద్ద ఈ ఘటన చోటు చేసుకున్నట్లు స్థానిక పోలీసు అధికారులు తెలిపారు. పేలుడు ధాటికి అక్కడ దాదాపు ఒకటిన్నర అడుగుల లోతైన గుంత ఏర్పడగా, సమీపంలోని దుకాణాలు, భవనాల కిటికీలు ధ్వంసం కావడం గమనార్హం. ద్విచక్ర వాహనాలూ దెబ్బతిన్నాయి. ఎప్పుడూ రద్దీగా ఉండే ఈ మార్కెట్‌లో భారతీయ వస్తువుల విక్రయాలు సాగుతుంటాయని స్థానికులు చెప్పారు.

పేలుడు సమాచారం అందుకున్న వెంటనే పోలీసులు ఘటనా స్థలానికి చేరుకుని, ఆ ప్రాంతాన్ని తమ అధీనంలోకి తీసుకున్నారు. మరోవైపు, ఇప్పటి వరకు ఏ సంస్థ ఈ ఘటనకు బాధ్యత వహించలేదు. అయితే, ద్విచక్ర వాహనంలో అమర్చిన టైం బాంబు ఈ పేలుడుకు కారణమని ప్రాథమిక దర్యాప్తులో తేలిందని లాహోర్ పోలీసు అధికార ప్రతినిధి రాణా ఆరిఫ్ ఓ వార్తాసంస్థకు తెలిపారు. ఉగ్రవాద నిరోధక విభాగం, బాంబ్ డిస్పోజల్ స్క్వాడ్ అధికారులు ఘటనాస్థలికి చేరుకుని పేలుడు ఘటనను విశ్లేషిస్తున్నట్లు చెప్పారు. ఆస్పత్రికి తరలించిన వారిలోనూ నలుగురి పరిస్థితి విషమంగా ఉందని అక్కడి వైద్యులు తెలిపారు.