సాత్విక్‌ జోడీకి 8వ ర్యాంకు

దిల్లీ: ఇండియా ఓపెన్‌లో విజేతగా నిలిచిన భారత అగ్రశ్రేణి డబుల్స్‌ జోడీ సాత్విక్‌ సాయిరాజు- చిరాగ్‌ శెట్టి ప్రపంచ ర్యాంకింగ్స్‌లో తమ స్థానాన్ని మెరుగు పరుచుకుంది. మంగళవారం బీడబ్ల్యూఎఫ్‌ ప్రకటించిన జాబితాలో సాత్విక్‌- చిరాగ్‌ జోడీ రెండు స్థానాలు ఎగబాకి 8వ ర్యాంకు సాధించింది. 2019 నవంబరులో సాత్విక్‌- చిరాగ్‌ జోడీ తమ కెరీర్‌లో అత్యుత్తమంగా ఏడో ర్యాంకులో నిలిచింది. పురుషుల సింగిల్స్‌లో యువ ఆటగాడు లక్ష్యసేన్‌ కెరీర్‌లో అత్యుత్తమ ర్యాంకు సాధించాడు. ఇండియా ఓపెన్‌ టైటిల్‌ గెలుచుకున్న లక్ష్యసేన్‌ నాలుగు స్థానాలు మెరుగు పరుచుకుని 13వ ర్యాంకు సొంతం చేసుకున్నాడు. కిదాంబి శ్రీకాంత్‌ పదో స్థానంలో నిలిచాడు. మహిళల సింగిల్స్‌లో పి.వి.సింధు ఏడో ర్యాంకుతో కొనసాగుతుంది.