Ts News: అదే జరిగితే కేసీఆర్‌ను ప్రజలు బంగాళాఖాతంలో కలిపేస్తారు: రేవంత్‌రెడ్డి

హైదరాబాద్: ప్రజలను మోసం చేయడంలో, పక్కదారి పట్టించడంలో భాజపా, తెరాస ఒకటేనని టీపీసీసీ అధ్యక్షుడు రేవంత్‌ రెడ్డి విమర్శించారు. ముఖ్యమంత్రి కేసీఆర్‌ నిర్వహించిన మీడియా సమావేశంపై రేవంత్‌ స్పందించారు. సీఎం కేసీఆర్, ప్రధాని మోదీ ఇద్దరూ కలిసి రైతులను మోసం చేస్తున్నారన్నారు. పంజాబ్‌ సహా 24 రాష్ట్రాల్లో పెట్రోల్, డీజిల్‌పై వ్యాట్ తగ్గిస్తే.. తెలంగాణలో ఎందుకు తగ్గించరని ప్రశ్నించారు. ప్రజలను దోచుకోవడంలో, అవినీతి సొమ్ము దాచుకోవడంలో కేసీఆర్, మోదీ ఇద్దరూఇద్దరే అని వ్యాఖ్యానించారు. వరి వేసేది లేదని కేంద్రానికి చెప్పి.. వరి వేస్తే ఉరి అని కేసీఆర్ తెలంగాణ రైతులకు మరణశాసనం రాశారన్నారు. కేసీఆర్ రాజకీయాలకు తెలంగాణ ప్రజలు ఉరి పెట్టె రోజులు దగ్గర్లోనే ఉన్నాయని వెల్లడించారు. రాయచూరు ప్రజలు వారిని తెలంగాణలో కలపాలని అంటున్నారని.. అదే జరిగితే సీఎం కేసీఆర్‌ను తెలంగాణ ప్రజలు బంగాళాఖాతంలో కలుపుతారని ఎద్దేవా చేశారు. ప్రధాని మోదీ, భాజపాపైన యుద్ధం అంటూ మరోసారి సీఎం కేసీఆర్ నటిస్తున్నారని మండిపడ్డారు.