Ap News: 3 రాజధానుల బిల్లు ఉపసంహరణ.. రైతుల తొలి విజయం: కనకమేడల

అమరావతి: రాజధాని అంశంపై న్యాయ ప్రక్రియకు అడ్డుతగిలే కుట్రలో భాగంగానే 3 రాజధానుల బిల్లుల ఉపసంహరణ నాటకాన్ని తెరపైకి తీసుకొచ్చారని ఎంపీ కనకమేడల రవీంద్ర కుమార్ ఆరోపించారు. 3 రాజధానుల బిల్లులో ఎన్నో చట్ట ఉల్లంఘనలు ఉన్నందునే ఏ కోర్టులోనూ ఆ బిల్లు నిలబడదని.. న్యాయస్థానంలో ప్రభుత్వానికి వ్యతిరేకంగా తీర్పు రానుందని ప్రభుత్వం ముందుగానే పసిగట్టిందన్నారు. పూర్తిస్థాయి బిల్లుతో మరోసారి ప్రజల ముందుకొస్తానని చెప్పిన సీఎం.. ప్రస్తుతం తీసుకొచ్చిన బిల్లు అసంపూర్తిగా ఉందని అంగీకరించినట్లేనని పేర్కొన్నారు. ఏదేమైనా 3 రాజధానుల బిల్లు ఉపసంహరణ మహాపాదయాత్రలో రైతుల తొలి విజయంగా ఆయన అభివర్ణించారు. రైతుల మహాపాదయాత్రతో ప్రభుత్వం భయపడబట్టే మద్దతు తెలిపేవారిపై అక్రమ కేసులు బనాయిస్తోందని మండిపడ్డారు. క్రమశిక్షణతో సాగుతున్న పాదయాత్రకు మద్దతు తెలిపే వారిపై పోలీసుల బెదిరింపులు సరికాదన్నారు.