అభివృద్ధికే పట్టభద్రులు ఓటేశారు: తలసాని 

హైదరాబాద్‌: మహబూబ్‌నగర్‌-రంగారెడ్డి-హైదరాబాద్‌ పట్టభద్రుల ఎమ్మెల్సీ ఎన్నికల్లో మాజీ ప్రధాని పీవీ కుమార్తె వాణీదేవి విజయంపై మంత్రి తలసాని శ్రీనివాస్‌ యాదవ్‌ హర్షం వ్యక్తంచేశారు. ఈ తీర్పు ప్రతిపక్షాలకు చెంపపెట్టులాంటిదన్నారు. పార్టీ కార్యనిర్వాహక అధ్యక్షుడు కేటీఆర్‌ ఎప్పటికప్పుడు తమను అప్రమత్తం చేస్తూ వచ్చారన్నారు. ప్రత్యేకించి భాజపాకు చెంపచెళ్లుమనేలా పట్టభద్రులు సమాధానం చెప్పారన్నారు. ఈ విజయం తమ పార్టీకి ఇంకా బలాన్నిచ్చిందని, మరింత ఉత్సాహంగా  పనిచేస్తామని చెప్పారు. రాష్ట్రంలో జరుగుతున్న అభివృద్ధిని చూసి పట్టభద్రులు ఓటేశారన్నారు. రాష్ట్రం వచ్చాక ప్రభుత్వ, ప్రైవేటు ఉద్యోగాలు కల్పించామన్నారు. ప్రతి రౌండ్‌లోనూ తమకు మెజార్టీ వచ్చిందని చెప్పారు. ఏ నమ్మకంతో తమకు ఓటేశారో, ఆ నమ్మకాన్ని నిలబెట్టుకుంటామన్నారు.