ఆర్టికల్‌ 370పై కాంగ్రెస్‌ వైఖరి తెలపాలి!

దిగ్విజయ్ సింగ్‌ వ్యాఖ్యలను ఖండించిన రవిశంకర్‌ ప్రసాద్‌

దిల్లీ: ఆర్టికల్‌ 370 రద్దుపై స్పష్టమైన వైఖరిని తెలపాలంటూ కాంగ్రెస్‌ను కేంద్ర న్యాయ శాఖ మంత్రి రవిశంకర్‌ ప్రసాద్‌ డిమాండ్‌ చేశారు. కాంగ్రెస్‌ పార్టీ అధికారంలోకి వస్తే ఆర్టికల్‌ 370 రద్దు అంశాన్ని పునరాలోచిస్తామంటూ పాకిస్థాన్‌కు చెందిన ఓ విలేకరితో దిగ్విజయ్‌ సింగ్‌ చెప్పిన నేపథ్యంలో మంత్రి ఈ వ్యాఖ్యలు చేశారు. దిగ్విజయ్‌ చేసిన వ్యాఖ్యలను ఆయన ఖండించారు. ఈ మేరకు మంత్రి ఆదివారం వరుస ట్వీట్లు చేశారు. దిగ్విజయ్‌ సింగ్‌ సూచించినట్టుగా ఆర్టికల్‌ 370 పునరుద్థరణపై కాంగ్రెస్‌ యోచిస్తోందా? అని ప్రశ్నించారు. ఈ అంశంపై కాంగ్రెస్‌ ఉద్దేశపూర్వకంగా మౌనం వహిస్తోందని ఆరోపించారు. వెంటనే మౌనం వీడాలని పార్టీని డిమాండ్‌ చేశారు. ఈ ఆర్టికల్‌ను రద్దు చేసిన అనంతరం జమ్మూ కశ్మీర్‌లో సుపరిపాలన సాగుతోందన్నారు. కరోనా కట్టడిలో భాగంగా అక్కడి మారుమూల ప్రాంతాల్లోనూ వ్యాక్సినేషన్‌ ప్రక్రియ వేగంగా కొనసాగడం అందుకు నిదర్శనం అని పేర్కొన్నారు.