రాజధాని పోరు: లోకేశ్‌ బైక్‌పై సీపీఐ నారాయణ

మంగళగిరి: అమరావతిలోనే రాజధాని కొనసాగించాలని డిమాండ్‌ చేస్తూ రైతులు చేపట్టిన ఆందోళన 31వ రోజూ కొనసాగుతోంది. రైతులు, మహిళలు వివిధ రూపాల్లో తమ నిరసనను వ్యక్తంచేస్తున్నారు. అమరావతి రైతులకు మద్దతుగా గుంటూరు జిల్లా మంగళగిరిలో రాజకీయ ఐకాస   ద్విచక్ర వాహన ర్యాలీ చేపట్టింది. ఈ ర్యాలీలో తెదేపా జాతీయ ప్రధాన కార్యదర్శి నారా లోకేశ్‌, సీపీఐ నేతలు నారాయణ, ముప్పాళ్ల నాగేశ్వరరావు తదితరులు పాల్గొన్నారు. సీతారామ కూడలి నుంచి అంబేడ్కర్‌ కూడలి వరకు సాగిన ఈ ర్యాలీలో సీపీఐ జాతీయ కార్యదర్శి నారాయణను లోకేశ్‌ తన బైక్‌పై కూర్చోబెట్టుకొని ర్యాలీగా వెళ్లారు. ఈ ర్యాలీలో మంగళగిరి పరిధిలోని గ్రామాల నుంచి రైతులు పాల్గొన్నారు.