అమిత్‌ షాతో తోమర్‌ రెండున్నర గంటల భేటీ!

దిల్లీ: వ్యవసాయ చట్టాలను కేంద్రం ఉపసంహరించుకొనే వరకూ వెనక్కి తగ్గేదిలేదని రైతు సంఘాలు తేల్చి చెప్పిన నేపథ్యంలో కేంద్ర హోంమంత్రి అమిత్ షాతో వ్యవసాయ శాఖ మంత్రి నరేంద్ర సింగ్‌ తోమర్‌ బుధవారం భేటీ అయ్యారు. దాదాపు రెండున్నర గంటలకు పైగా వీరిద్దరి మధ్య సమావేశం జరిగింది. మంగళవారం రాత్రి రైతు సంఘాలతో చర్చించిన అమిత్‌ షా చట్టాలను వెనక్కి తీసుకొనేది లేదని, కొన్ని సవరణలకు అంగీకరిస్తామని స్పష్టంచేశారు.

అలాగే, గత 14 రోజులుగా పోరాటాన్ని కొనసాగిస్తున్న రైతు సంఘాలకు బుధవారం మధ్యాహ్నం కేంద్ర ప్రభుత్వం కొన్ని ప్రతిపాదనలను పంపింది. వాటిని తిరస్కరించిన రైతు సంఘాల నేతలు తమ పోరాటాన్ని మరింత ఉద్ధృతం చేస్తున్నట్టు ప్రకటించారు. ఈ మేరకు ఉద్యమ కార్యాచరణను కూడా ప్రకటించారు. మరోవైపు, విపక్ష నేతల బృందం రాష్ట్రపతి రామ్‌నాథ్‌ కోవింద్‌ను కలిసింది. వ్యవసాయ చట్టాలపై దేశవ్యాప్తంగా రైతుల ఆందోళనల విషయాన్ని ఆయన దృష్టికి తీసుకెళ్లిన నేతలు.. వాటిని ఉపసంహరించుకోవాలని కోరిన విషయం తెలిసిందే.