Sunil Shetty: డ్రగ్స్ కేస్‌లో దర్యాప్తు పూర్తయ్యే వరకు వేచిచూడాలి..

ఇంటర్నెట్‌ డెస్క్‌: సంచలనంగా మారిన ముంబయి డ్రగ్స్‌ కేస్‌ విషయంపై బాలీవుడ్‌ ప్రముఖ నటుడు సునీల్‌ శెట్టి స్పందించారు. ఈ కేసులో పట్టుబడ్డ షారుఖ్‌ ఖాన్‌ కుమారుడు ఆర్యన్‌ ఖాన్‌ సహా మిగతా కుర్రాళ్ల విషయంలో దర్యాప్తు నివేదిక వచ్చే వరకు వేచి చూడాలని సూచించారు. నిజమైన నివేదిక వచ్చిన తర్వాతే ఓ అంచనాకి రావాలన్నారు. ఎవరైనా ఇలాంటి కేసుల్లో పట్డుబడితే అనేక రకాలుగా ఊహించుకోవడం సహజమని పేర్కొన్నారు. కుర్రాళ్లని సంరక్షించుకోవడం మన బాధ్యత అని అన్నారు. ముంబయి నగర శివారులోని తీరప్రాంతంలో క్రూజ్‌ నౌకపై శనివారం నిర్వహించిన ఓ రేవ్‌పార్టీలో ఆర్యన్‌తోపాటు మరికొందరు హాజరయ్యారు. అక్కడ మాదకద్రవ్యాలు వినియోగిస్తున్నారనే సమాచారం తెలుసుకున్న నార్కోటిక్స్‌ కంట్రోల్‌ బ్యూరో (ఎన్‌. సి.బి) అధికారులు సోదా చేశారు. సుదీర్ఘ విచారణ అనంతరం ఆర్యన్‌తో సహా పలువురిని అరెస్ట్‌ చేశారు.