Jai Bhim: సూర్య ‘జై భీమ్‌’కు మరో అరుదైన గౌరవం

ఇంటర్నెట్‌డెస్క్‌: మాస్‌ పాత్రల్లోనే కాదు, అప్పుడప్పుడు వైవిధ్యమైన పాత్రల్లో కనిపిస్తారు నటుడు సూర్య. అలా ఆయన నటించి, నిర్మించిన చిత్రం ‘జై భీమ్‌’. తా.సే.జ్ఞానవేల్‌ దర్శకుడు. గతేడాది నవంబరులో ఓటీటీలో విడుదలైన ఈ సినిమా విమర్శకులను సైతం మెప్పించింది.

వాస్తవ సంఘటనల ఆధారంగా అల్లుకున్న ఓ కోర్టు డ్రామా కథాంశంతో ఈ చిత్రాన్ని రూపొందించారు. కాగా, ఇప్పుడు ఈ సినిమా ఓ అరుదైన గౌరవాన్ని సొంతం చేసుకుంది. అకాడమీ(ఆస్కార్‌) అధికారిక యూట్యూబ్‌ ఛానెల్‌లో ఈ సినిమాకు సంబంధించిన వీడియోను ఉంచారు. అకాడమీ యూట్యూబ్‌ వేదికగా ఒక తమిళ సినిమాకు సంబంధించిన వీడియోను ఉంచటం ఇదే తొలిసారి. దీంతో చిత్ర బృందంతో పాటు, సూర్య అభిమానులు సైతం హర్షం వ్యక్తం చేస్తున్నారు. ‘జై భీమ్‌’ ఇండియన్‌ సినిమా స్థాయి మరో మెట్టు ఎక్కించిందని సంతోషం వ్యక్తం చేస్తున్నారు. జస్టిస్‌ చంద్రు జీవితకథ ఆధారంగా ‘జై భీమ్‌’ను తెరకెక్కించారు.