Vaccine: వాళ్లలో సహజ రోగనిరోధకతను పెంచుతుంది

అమెరికాలోని రాక్‌ఫెల్లర్‌ విశ్వవిద్యాలయ పరిశోధకుల వెల్లడి 

ఇంటర్నెట్‌డెస్క్‌: కొవిడ్‌ సోకిన వాళ్లు టీకా తీసుకోవడం వల్ల సహజ రోగనిరోధక శక్తి పెరుగుతుందని, కొత్తరకం కరోనా వైరస్‌ల నుంచి రక్షణ లభిస్తుందని నూతన అధ్యయనాలు చెబుతున్నాయి. రోగనిరోధక వ్యవస్థకు చెందిన మెమొరీ బీ కణాలు ఉత్పత్తి చేసే ప్రతిరోధకాలు కొవిడ్‌-19, దాని జన్యువు అయిన సార్స్‌-కోవ్‌-2 ను తటస్థీకరించడంలో మెరుగ్గా పనిచేస్తున్నాయని పరిశోధనల్లో తేలింది. 

అమెరికాలోని రాక్‌ఫెల్లర్‌ విశ్వవిద్యాలయ పరిశోధకులు గతేడాది కొవిడ్‌ సోకిన 63 మంది రక్తంలో ఉన్న ప్రతిరోధకాలను విశ్లేషించి, వాటి పరిణామాన్ని గుర్తించారు. మెమొరీ బీ కణాలు రోగనిరోధక రిజర్వాయర్‌గా పనిచేసి యాంటిబాడీలను సేకరిస్తాయని, ఈ యాంటీబాడీలు ఏర్పడిన వ్యక్తుల్లో వైరస్‌ నుంచి దీర్ఘకాలిక రక్షణ లభిస్తుందని పరిశోధకులు తెలిపారు.

మోడెర్నా, ఫైజర్‌ వ్యాక్సిన్‌ మొదటి డోసు తీసుకున్న ఒక సమూహంలోని 26 మందిలో ప్రతిరోధకాలు బాగా పెరిగాయని కనుగొన్నారు. వీళ్లలో యూకే, దక్షిణాఫ్రికా, అమెరికాకు చెందిన సార్స్‌-కోవ్‌-2 వేరియంట్లను ఎదుర్కొనే యాంటీబాడీలను గుర్తించారు. ఈ ప్రతిరోధకాలు అభివృద్ధి చెందిన మెమొరీ బీ కణాల సమూహాల ద్వారా ఉత్పత్తి అవుతాయని, వ్యాక్సిన్‌ తీసుకోవడం వల్లే ప్రతిరోధకాలు పెరిగాయని పరిశోధకులు తెలిపారు. కరోనా సోకని వాళ్లు టీకా తీసుకోవడం వల్ల వైరస్‌ నుంచి అదనపు రక్షణ లభిస్తుందని ఈ అధ్యయనం వెల్లడించింది.