Twitter: పలువురికి ట్విటర్‌ నోటీసులు

దిల్లీ: ప్రముఖ కార్టూనిస్ట్‌ మంజుల్‌, ఫ్యాక్ట్‌చెక్‌ వెబ్‌సైట్‌ ఆల్ట్‌న్యూస్‌ సహ వ్యవస్థాపకుడు మహ్మద్‌ జుబైర్‌ సహా పలువురికి ట్విటర్‌ నోటీసులు జారీ చేసింది. చట్టాన్ని ఉల్లంఘించారన్న కారణంతో వారి ట్వీట్లను తొలగించాలని ప్రభుత్వ ఏజెన్సీలు సూచించిన నేపథ్యంలో ఈ నోటీసులు పంపినట్లు వెల్లడించింది. అయితే, ఏ సంస్థలు అడిగాయనే వివరాలను మాత్రం ట్విటర్‌ పేర్కొనలేదు. ట్విటర్‌ నుంచి తమకు అందిన నోటీసులను మంజుల్‌, జుబైర్‌ తదితరులు షేర్‌ చేశారు.

మంజుల్‌కు పంపిన నోటీసులో ‘ప్రభుత్వ చట్టాలను ఉల్లంఘించేదిగా ఉన్న @MANJULtoons ఖాతాలోని కొన్ని ట్వీట్లను తొలగించాలని ప్రభుత్వ ఎన్‌ఫోర్స్‌మెంట్‌ సంస్థల నుంచి విజ్ఞాపన వచ్చింది. ఈ విషయాన్ని మీ దృష్టికి తెస్తున్నాం. ప్రభుత్వం నుంచి ఇలాంటి విన్నపం వచ్చినప్పుడు యూజర్‌ దృష్టికి తీసుకెళ్లడం ట్విటర్‌ బాధ్యత’’ అని ట్విటర్‌ పేర్కొంది. ‘‘కావాలంటే ఈ అంశంపై మీరు కోర్టును ఆశ్రయించ వచ్చు. లేదంటే మీరు స్వచ్ఛందంగా సదరు ట్వీట్‌ను తొలగించ వచ్చు’’ అని తెలిపింది. మహ్మద్‌ జుబైర్‌,  రిటైర్డ్‌ ఐఏఎస్‌ అధికారి సూర్య ప్రతాప్‌ సింగ్‌ సైతం ఇలాంటి నోటీసులనే అందుకున్నారు. ఈ ముగ్గురికీ లక్షల్లో ఫాలోవర్లు ఉన్నారు.