Om Prakash Chautala: పదో తరగతి పరీక్ష రాసిన మాజీ ముఖ్యమంత్రి

చండీగఢ్‌: 86 ఏళ్ల వయస్సులో హరియాణా మాజీ ముఖ్యమంత్రి ఓం ప్రకాశ్ చౌతాలా పదో తరగతి పరీక్ష రాశారు. ఆయన సిర్సాలోని ఆర్య కన్యా సీనియర్ సెకండరీ పాఠశాలలో ఇంగ్లీషు పరీక్షకు హాజరయ్యారు. 

ఈ ఏడాది ఆరంభంలో హరియాణా ఓపెన్ బోర్డు కింద చౌతాలా 12వ తరగతి పరీక్షలు రాశారు. అయితే ఆయన 10వ తరగతి ఇంగ్లీషులో పాస్ మార్కును సాధించలేకపోయారు. అది పాస్‌ అయ్యే వరకు 12వ తరగతి ఫలితాలను బోర్డు నిలిపివేసింది. దానికోసమే ఆయన బుధవారం ఇంగ్లీషు పరీక్షను రాయాల్సి వచ్చింది. కాగా, అనారోగ్యం కారణంగా పరీక్ష రాసేందుకు సహాయకుడి కోసం ఆయన అభ్యర్థన పెట్టుకున్నారు. బోర్డు నుంచి అనుమతి వచ్చిన అనంతరం ఆయన పరీక్షను పూర్తి చేశారు. అయితే ఆయన పరీక్షా కేంద్రానికి వచ్చిన క్రమంలో మీడియా ఆయనతో మాట్లేందుకు ప్రయత్నించగా..‘ నేను విద్యార్థిని. నో కామెంట్స్‌’ అని వ్యాఖ్యానించారు.  

ఇదిలా ఉండగా.. ఉపాధ్యాయుల భర్తీలో జరిగిన అక్రమాలకుగానూ ఆయనకు పదేళ్ల జైలు శిక్ష పడింది. 2013 నుంచి ఆయన తిహార్‌ జైల్లోనే శిక్షను అనుభవించారు. ఆ సమయంలో పదవ తరగతి పరీక్షలకు సిద్ధమయ్యారు. ఈ ఏడాదే  జైలు నుంచి విడుదలయ్యారు.