Divorce: నల్లగా ఉందని భార్యకు విడాకులు

నల్లగా ఉన్నాననే కారణం చెబుతూ తనకు తలాక్‌ చెప్పాడని భర్తపై కేసు పెట్టింది ఓ మహిళ. వివాహం జరిగిన తొమ్మిది నెలలకే విడాకులు ఇచ్చిన ఈ సంఘటన ఉత్తర్‌ప్రదేశ్‌లోని బరేలీ జిల్లాలో జరిగింది. నల్లగా ఉన్నానని తన భర్త, అత్తింటివారు హేళన చేయటం సహా హింసిస్తున్నారని బాధిత మహిళ ఫిర్యాదులో పేర్కొన్నారు. కంటోన్మెంట్‌ ప్రాంతానికి చెందిన ఆలం అనే వ్యక్తితో ఈ ఏడాది మార్చి 7న బాధిత మహిళకు వివాహం జరిగింది. పెళ్లి సమయంలో సుమారు మూడెకరాలు కట్నంగా ఇచ్చారు. కొద్ది రోజుల తర్వాత అదనపు కట్నం కోసం వేధించటం ప్రారంభించారు. బాధితురాలి తండ్రి వద్ద మిగిలి ఉన్న భూమిని విక్రయించి రూ.10 లక్షలు తేవాలని, దాంతో కారు కొనుగోలు చేయాలనుకుంటున్నట్లు ఒత్తిడి చేశారు. అందుకు నిరాకరించటం వల్ల పలుమార్లు దాడి చేశారు. గృహహింస, ముమ్మారు తలాక్‌, నల్లగా ఉందని హేళన, అదనపు కట్నం కోసం వేధింపుల ఆరోపణలతో కేసు నమోదు చేసినట్లు ఇన్‌స్పెక్టర్‌ రాజీవ్‌ సింగ్‌ తెలిపారు.