Supreme Court: సుప్రీంలో అసాధారణ దృశ్యం!

ఆసుపత్రి నుంచే వాదనలు వినిపించిన న్యాయవాది

దిల్లీ: దేశ సర్వోన్నత న్యాయస్థానంలో బుధవారం ఓ అరుదైన దృశ్యం ఆవిష్కృతమైంది. ఎస్సీ, ఎస్టీ ఉద్యోగుల పదోన్నతుల్లో రిజర్వేషన్లకు సంబంధించిన కేసులో వారి తరఫు సీనియర్‌ న్యాయవాది ఆసుపత్రి నుంచే వాదనలు వినిపించారు. సుప్రీంకోర్టు విచారణలు వర్చువల్‌ విధానంలో కొనసాగుతున్న విషయం తెలిసిందే. పదోన్నతుల్లో రిజర్వేషన్ల కేసు విచారణ కీలక దశకు చేరుకుంది. జస్టిస్‌ ఎల్‌.నాగేశ్వరరావు, జస్టిస్‌ సంజీవ్‌ ఖన్నా, జస్టిస్‌ బి.ఆర్‌.గవయ్‌ల ధర్మాసనం బుధవారం విచారణ ప్రారంభించే సమయానికి సీనియర్‌ న్యాయవాది ఆసుపత్రిలో ఉన్న దృశ్యం స్క్రీన్‌పై కనిపించింది. ఆయన వాదనలు వినిపించడానికి ఉద్యుక్తులవుతుండగా ‘‘ముందు...మీ ఆరోగ్యం ఎలా ఉందో చెప్పండి?’’ అంటూ సీనియర్‌ న్యాయవాదిని జస్టిస్‌ నాగేశ్వరరావు పరామర్శించారు.