Pakistan: దైవదూషణ ఆరోపణలు.. పాక్‌లో శ్రీలంక జాతీయుడి బహిరంగ దహనం!

ఇస్లామాబాద్‌: పాకిస్థాన్‌లో దారుణం చోటుచేసుకుంది. దైవదూషణ ఆరోపణలపై ఆగ్రహంతో ఊగిపోయిన ఓ మూక.. శ్రీలంక జాతీయుడిని చిత్రహింసలకు గురి చేసి చంపి, ఆపై అతని మృతదేహాన్ని బహిరంగంగా దహనం చేసింది. పంజాబ్‌ ప్రావిన్స్‌ సియాల్‌కోట్‌లోని వజీరాబాద్ రోడ్‌లో శుక్రవారం ఈ ఘటన జరిగినట్లు స్థానిక మీడియా వెల్లడించింది. ఇక్కడి ప్రైవేట్ కార్మాగారాల్లో పనిచేసే కార్మికులు.. అక్కడే ఓ పరిశ్రమలో జనరల్‌ మేనేజర్‌గా విధులు నిర్వహిస్తున్న శ్రీలంక జాతీయుడిపై దాడి చేసి, అతన్ని చంపిన తర్వాత, మృతదేహాన్ని తగులబెట్టినట్లు పేర్కొంది. మృతుడిని ప్రియాంత కుమారగా గుర్తించినట్లు సియాల్‌కోట్ జిల్లా పోలీసు అధికారి తెలిపారు. ఈ ఘటనకు గల కారణాలు అన్వేషిస్తున్నట్లు చెప్పారు. అయితే, దైవదూషణకు పాల్పడినందుకుగానూ అతన్ని శిక్షించాలంటూ అక్కడున్న వందలాదిమంది నినాదాలు చేస్తున్న వీడియోలు స్థానికంగా వైరల్‌గా మారాయి. దాడికి పాల్పడిన వారిలో చాలామంది తెహ్రీక్‌-ఇ-లబ్బాయిక్‌ పాకిస్థాన్‌ (టీఎల్‌పీ) పార్టీ మద్దతుదారులని స్థానిక అధికారులు తెలిపారు.

ఆమ్నెస్టీ ఇంటర్నేషనల్‌ ఆందోళన..

పంజాబ్ ప్రావిన్స్‌ ముఖ్యమంత్రి ఉస్మాన్ బుజ్దార్ ఈ ఘటనను విషాదకరమైనదిగా అభివర్ణించారు. వెంటనే దీనిపై విచారణ జరిపి నివేదిక ఇవ్వాలని, చట్టాన్ని చేతుల్లోకి తీసుకున్న వారిపై చర్యలు తీసుకోవాలని ఆదేశించారు. పోలీసులు ఘటనాస్థలంలోనే ఉన్నారని.. ఈ వ్యవహారానికి సంబంధించిన అన్ని కోణాల్లోనూ దర్యాప్తు చేస్తున్నట్లు పంజాబ్ ఐజీపీ అలీఖాన్ వెల్లడించారు. మరోవైపు ఈ ఘటనపై హక్కుల సంస్థ ‘ఆమ్నెస్టీ ఇంటర్నేషనల్’ దక్షిణాసియా విభాగం తీవ్ర ఆందోళన వ్యక్తం చేసింది. అధికారులు తక్షణమే నిష్పక్షపాతంగా, సత్వర విచారణ జరిపి బాధ్యులను గుర్తించాలని డిమాండ్‌ చేసింది. 2010లోనూ ఈ ప్రాంతంలో ఇదే తరహా జరిగిన దాడిలో ఇద్దరు మృతి చెందారు. ఇదిలా ఉండగా టీఎల్‌పీ పార్టీపై పాక్‌ ప్రభుత్వం ఇటీవలే నిషేధాన్ని ఎత్తివేసిన విషయం తెలిసిందే.