బెంగాల్‌లో కలకలం.. 200 శునకాల దుర్మరణం

కోల్‌కతా: బెంగాల్‌లో శునకాల అనుమానాస్పద మృతి కలకలం సృష్టిస్తోంది. బెంగాల్‌లోని బంకురా జిల్లా బిష్ణుపూర్‌ పట్టణంలో మూడు రోజుల వ్యవధిలో 200లకు పైగా వీధి శునకాలు మృత్యువాత పడ్డాయి. మంగళవారం నాడు 60, బుధవారం ఏకంగా 97 , గురువారం రోజున 45 శునకాలు మృతిచెందినట్లు స్థానిక అధికారులు వెల్లడించారు. ఈ విషయాన్ని జిల్లా అధికారులకు తెలియజేసినట్లు వారు పేర్కొన్నారు. కాగా మృతిచెందిన శునకాల నుంచి నమూనాలు సేకరించిన వెటర్నరీ సిబ్బంది పరీక్షల నిమిత్తం వాటిని కోల్‌కతా పంపించారు. అయితే పెద్ద ఎత్తున కుక్కల మృతికి వైరల్‌ ఇన్‌ఫెక్షన్‌ కారణమని వైద్య సిబ్బంది అనుమానిస్తున్నారు.