Corona: వారిలో రీఇన్‌ఫెక్షన్‌ ముప్పు తక్కువే

కొలంబియా: కరోనా కారణంగా ఒకసారి తీవ్రంగా అనారోగ్యం పాలైనవారికి రెండోసారి వైరస్‌ సోకే ముప్పు చాలా తక్కువగా ఉంటుందని తాజా అధ్యయనమొకటి తేల్చింది. 1% కంటే తక్కువ కేసుల్లోనే రీఇన్‌ఫెక్షన్‌ కనిపిస్తోందని నిర్ధారించింది. అమెరికాలోని యూనివర్సిటీ ఆఫ్‌ మసోరీ స్కూల్‌ ఆఫ్‌ మెడిసిన్‌ పరిశోధకులు.. కొవిడ్‌ దెబ్బకు తీవ్రంగా జబ్బుపడిన 9,119 మంది డేటాను సేకరించి ఈ అధ్యయనాన్ని నిర్వహించారు. వారిలో 63 మంది (0.7%) మాత్రమే రెండోసారి కరోనా బారిన పడ్డారు. రెండుసార్లు పాజిటివ్‌గా తేలడానికి మధ్య కాలం సగటున 116 రోజులుగా నమోదైంది. రీఇన్‌ఫెక్షన్‌ బాధితుల్లో ఇద్దరు మాత్రమే (3.2%) మృత్యువాతపడ్డారు. తొలిసారి పాజిటివ్‌ వచ్చినప్పటితో పోలిస్తే.. రెండోసారి వైరస్‌ సోకినవారిలో న్యుమోనియా, గుండె వైఫల్యం, మూత్రపిండ సంబంధిత వ్యాధుల వంటి సమస్యలు తలెత్తే అవకాశాలు చాలా స్వల్పంగా ఉన్నాయని పరిశోధకులు తెలిపారు.