వీరులారా.. దేశం మీకు సెల్యూట్‌ చేస్తోంది

దిల్లీ: తూర్పు లద్దాఖ్‌లోని గాల్వన్‌ లోయ వద్ద భారత్‌ - చైనా బలగాల మధ్య చోటుచేసుకున్న తీవ్ర ఘర్షణలో 20మంది జవాన్లు వీరమరణం పొందడంపై కేంద్ర హోంమంత్రి అమిత్‌ షా తీవ్ర దిగ్భ్రాంతి వ్యక్తంచేశారు. దేశ భూభాగాన్ని రక్షించే క్రమంలో వారు ప్రాణాలు కోల్పోవడం బాధాకరమని.. ఈ విషాదాన్ని మాటల్లో చెప్పలేమన్నారు. ఈ వీర జవాన్ల త్యాగాలకు దేశం సెల్యూట్‌ చేస్తోందని ఆయన ట్విటర్‌లో పేర్కొన్నారు. ఆ సైనికుల ధైర్యం భరతమాతను కాపాడుకోవడం పట్ల ఉన్న నిబద్ధతను స్పష్టంచేస్తోందన్నారు. 

ఇంతటి గొప్ప ధీరత్వం కలిగిన హీరోలను భారత సైన్యానికి అందించిన ఆ కుటుంబాలకు శిరస్సు వంచి నమస్కరిస్తున్నానన్నారు. సైనికుల అత్యున్నత త్యాగాలకు దేశం ఎల్లప్పుడూ రుణపడి ఉంటుందని అమిత్‌ షా చెప్పారు. జవాన్లను కోల్పోయిన ఈ దుఃఖ సమయంలో ఆయా కుటుంబాలకు ప్రధాని మోదీతో పాటు యావత్‌ దేశం అండగా నిలుస్తుందని భరోసా ఇచ్చారు. చైనా సైనికుల దాడిలో గాయపడిన సైనికులు త్వరగా కోలుకోవాలని ఆకాంక్షించారు.