దిల్లీ అల్లర్లు: తాహిర్‌ హుస్సేన్‌పై ఈడీ కేసు!

దిల్లీ: ఈశాన్య దిల్లీ అల్లర్లలో ఇంటెలిజెన్స్‌ బ్యూరో(ఐబీ) అధికారి అంకిత్‌ శర్మ హత్య కేసులో అరెస్టయిన తాహిర్‌ హుస్సేన్‌పై ఎన్‌ఫోర్స్‌మెంట్‌ డైరెక్టరేట్‌ కేసు నమోదు చేసింది. ఇస్లామిస్ట్‌ గ్రూప్‌ పాపులర్‌ ఫ్రంట్‌ ఇఫ్‌ ఇండియా(పీఎఫ్‌ఐ)పైనా కేసు మోపారు. అల్లర్లకు నిధులు సమకూర్చారన్న ఆరోపణల నేపథ్యంలోనే ఈడీ చర్యలకు ఉపక్రమించింది. దీంతో అతనిపై నగదు అక్రమ చలామణి నిరోధక చట్టం(పీఎంఎల్‌ఏ) కింద కేసు నమోదు చేసినట్లు అధికారులు తెలిపారు. ప్రస్తుతం అతడు దిల్లీ పోలీసుల కస్టడీలో ఉన్నాడు. గత నెల ఈశాన్య దిల్లీలో సీఏఏ వ్యతిరేక, అనుకూల వర్గాల మధ్య తీవ్ర స్థాయిలో ఘర్షణలు చెలరేగిన విషయం తెలిసిందే. ఈ ఘటనల్లో దాదాపు 50 మంది ప్రాణాలు కోల్పోయారు. భారీ స్థాయిలో ఆస్తి నష్టం సంభవించింది. ఈ అల్లర్లను తాహిర్‌ హుస్సేనే ప్రోత్సహించినట్ల ఆరోపణలు ఉన్నాయి.