పోలీసులను పరామర్శించిన అమిత్‌ షా!

దిల్లీ: గణతంత్ర దినోత్సవం రోజున దిల్లీలో జరిగిన రైతుల ఆందోళనలో గాయపడిన పోలీసు సిబ్బందిని కేంద్ర హోంశాఖ మంత్రి అమిత్‌ షా పరామర్శించారు. నగరంలోని శుశ్రుత్‌ ట్రామా సెంటర్‌తో పాటు తీర్థ్‌ రామ్‌ ఆసుపత్రిలో చికిత్స పొందుతున్న పోలీసు సిబ్బంది ఆరోగ్య పరిస్థితిపై వైద్యులతో మాట్లాడారు. ప్రస్తుతం వారి ఆరోగ్యం నిలకడగానే ఉందన్న ఆయన, ఆందోళన సందర్భంగా దిల్లీ పోలీసులు చూపిన తెగువ, సంయమనం ఎంతో గర్వకారణమని ట్విటర్‌లో పేర్కొన్నారు. అమిత్‌ షాతోపాటు కేంద్ర హోంశాఖ కార్యదర్శి అజయ్‌ భల్లా, దిల్లీ పోలీస్‌ కమిషనర్‌ ఎస్‌ ఎన్‌ శ్రీవాస్తవ పోలీసు సిబ్బందిని పరామర్శించారు.

జనవరి 26న దిల్లీలో జరిగిన హింసాత్మక ఘటనల్లో రైతు సంఘాల నాయకులు పాల్గొన్నారని దిల్లీ పోలీస్‌ కమిషనర్‌ ఎస్‌ ఎన్‌ శ్రీవాస్తవ బుధవారం ఆరోపించిన విషయం తెలిసిందే. వీటికి బాధ్యులైన వారిని ఎట్టిపరిస్థితుల్లోనూ వదిలిపెట్టేది లేదని హెచ్చరించారు. ఈ నేపథ్యంలో దిల్లీ పోలీసులు రైతు సంఘాల నాయకులపై చర్యలు తీసుకునేందుకు నోటీసులు జారీచేశారు. ఇప్పటికే వారిపై ఎఫ్‌ఐఆర్‌ నమోదు చేసిన పోలీసులు.. పలువురు నాయకులపై లుకౌట్‌ నోటీసులు జారీచేశారు. వారి పాస్‌పోర్టులను కూడా వెంటనే పోలీసులకు సరెండర్‌ చేయాలని ఆదేశించారు.