ADB Loan: భారత్‌కు ₹11,185 కోట్ల రుణం.. ఏడీబీ ఆమోదం

దిల్లీ: కరోనా వైరస్‌ కట్టడి కోసం పోరాటం చేస్తున్న భారత్‌కు సహాయం చేసేందుకు ఆసియా అభివృద్ధి బ్యాంకు ‌(ఏడీబీ) ముందుకొచ్చింది. కరోనా నివారణ టీకాల కొనుగోలుకు భారీగా రుణం మంజూరుచేసేందుకు ఆమోదం తెలిపింది. వ్యాక్సిన్ల సేకరణకు 1.5బిలియన్‌ డాలర్లు (రూ.11,185 కోట్ల) మేర రుణం ఇచ్చేందుకు నిర్ణయం తీసుకుంది. ఈ మేరకు బ్యాంకు గురువారం ఓ ప్రకటన విడుదల చేసింది. సమర్థవంతమైన, సురక్షితమైన వ్యాక్సిన్ల కొనుగోలు కోసం భారత్‌కు 1.5 బిలియన్‌ డాలర్ల మేర రుణం మంజూరు చేసేందుకు ఆమోదం తెలిపినట్టు ఆ ప్రకటనలో పేర్కొంది. మరోవైపు, భారత్‌లో వ్యాక్సినేషన్‌ ప్రక్రియ నిరాటంకంగా కొనసాగుతోంది. నిన్న ఒక్కరోజే దేశవ్యాప్తంగా 90.27 లక్షల డోసులు పంపిణీ చేశారు. దేశంలో ఇప్పటిదాకా 119.38 కోట్లకు పైగా కొవిడ్‌ వ్యాక్సిన్‌ డోసుల పంపిణీ జరిగింది.

► Read latest National - International News and Telugu News