బోయింగ్‌ లోపాలను దాచింది..!

న్యూయార్క్‌: విమానంలో లోపాలున్నట్లు తెలిసినా ఆ విషయాన్ని పైలట్లకూ, విమాన రెగ్యులేటరీ సంస్థలకు బోయింగ్‌ సంస్థ చెప్పలేదని అమెరికా ప్రభుత్వ కమిటీ తెలిపింది. ఈ మేరకు అమెరికా ప్రతినిధుల సభకు చెందిన రవాణా, మౌలికసదుపాయాల కమిటీ ఓ నివేదికను అందజేసింది. ‘‘చికాగో కేంద్రంగా అభివృద్ధి చేసిన బోయింగ్‌ 737 మ్యాక్స్‌ విమానాలు కూలిపోవడానికి నిర్మాణలోపంతో పాటు సాంకేతిక సమస్యలు, కమ్యూనికేషన్స్‌ కూడా కారణమయ్యాయి’’ అని కమిటీ సభ్యులు వెల్లడించారు. దీనిని ప్రక్షాళన చేయాల్సిన అవసరముందని తేల్చారు. ఈ మేరకు 245 పేజీల నివేదికను హౌస్‌ ముందుంచారు.

‘‘బోయింగ్‌ సంస్థ ఇంజినీర్లు, కమ్యూనికేషన్‌ వ్యవస్థలో లోపాల వల్లే వరుస ప్రమాదాలు చోటు చేసుకున్నాయి. ఫెడరల్‌ ఏవియేషన్‌ అడ్మినిస్ట్రేషన్‌ మార్గదర్శకాలను బోయింగ్‌ సంస్థ సరిగా పాటించలేదు’’ అని కమిటీ పేర్కొంది. 2019లో లయన్‌ ఎయిర్‌, ఇథియోపియన్‌ ఎయిర్‌లైన్స్‌కు చెందిన రెండు వేర్వేరు విమాన ప్రమాదాల్లో 346 మంది ప్రాణాలు కోల్పోయిన విషయం తెలిసిందే. అంతేకాకుండా ఇటీవల కేరళలోని కోజీకోడ్‌ విమానాశ్రయంలో ‘ఎయిర్‌ ఇండియా ఎక్స్‌ ప్రెస్‌ విమానం’ అనూహ్యంగా అదుపుతప్పి లోయలో పడింది. ఈ ప్రమాదంలో 17 మంది చనిపోగా 100 మందికి పైగా గాయపడ్డారు. ఈ విమానం కూడా బోయింగ్ 737 రకానికి చెందినదే.