బీరుట్‌ బ్లాస్ట్‌: 190కి చేరిన మృతులు!

దెబ్బతిన్న 50వేల ఇళ్లు, 3లక్షల మంది నిరాశ్రయులు

బీరుట్‌: లెబనాన్‌ రాజధాని బీరుట్‌లో ఆగస్టు తొలివారంలో అత్యంత తీవ్రమైన పేలుడు ఘటన జరిగిన విషయం తెలిసిందే. ఈ ఘటనలో ఇప్పటివరకు మృతిచెందిన వారిసంఖ్య 190కి చేరినట్లు అక్కడి ప్రభుత్వం ప్రకటించింది. మరో 6500 మంది గాయాలపాలైనట్లు లెబనాన్‌ ప్రభుత్వం పేర్కొంది. మొన్నటివరకు 170మంది చనిపోయినట్లు గుర్తించగా, ప్రస్తుతం ఆ సంఖ్య 190కి చేరింది. మరికొందరి ఆచూకి కూడా లభించలేదని ప్రభుత్వం తెలిపింది. అంతేకాకుండా పేలుళ్ల ధాటికి నగరంలో 50వేల ఇళ్లు దెబ్బతిన్నట్లు ప్రభుత్వం పేర్కొంది. పేలుళ్ల వలన కలిగిన నష్టం దాదాపు 15 బిలియన్‌ డాలర్లు ఉంటుందని లెబనాన్‌ ప్రభుత్వం అంచనా వేసింది. ఈ భారీ పేలుళ్లకు పోర్టులో నిల్వ ఉంచిన రసాయనాలే కారణమని అధికారులు ఇప్పటికే తేల్చారు.