బెంగాల్‌ ఘటనపై విచారణకు అమిత్‌ షా ఆదేశం

దిల్లీ/ కోల్‌కతా: పశ్చిమ బెంగాల్‌ పర్యటనలో ఉన్న భాజపా జాతీయ అధ్యక్షుడు జేపీ నడ్డా కాన్వాయ్‌పై రాళ్లదాడి ఘటనపై కేంద్ర హోంమంత్రి అమిత్‌షా స్పందించారు. ఈ ఘటనపై విచారణకు ఆదేశించారు. దాడి ఘటనకు సంబంధించి రెండు నివేదికలను కోరారు. పశ్చిమ బెంగాల్‌లోని శాంతిభద్రతల అంశంపై గవర్నర్‌ను ఓ నివేదిక కోరగా..  ఘటనకు సంబంధించి వివరాలు ఇవ్వాలని అధికారుల నుంచి మరో నివేదిక అడిగారు.

మరోవైపు ఈ ఘటనపై భాజపా, తృణమూల్‌ కాంగ్రెస్‌ మధ్య మాటల యుద్ధం మొదలైంది. తృణమూల్‌ కార్యకర్తలే ఈ దాడికి పాల్పడ్డారని భాజపా ఆరోపించింది. దాడి సమయంలో పోలీసులు ఎవరినీ అడ్డుకునే ప్రయత్నం చేయలేదని ఆ పార్టీ రాష్ట్ర అధ్యక్షుడు దిలీప్‌ ఘోష్‌ ఆరోపించారు. దీనిపై బెంగాల్‌ ముఖ్యమంత్రి, తృణమూల్‌ అధినేత్రి మమత స్పందించారు. దాడి ఘటనను భాజపా ఆడుతున్న ‘డ్రామా’గా అభివర్ణించారు. తృణమూల్‌ ప్రభుత్వానికి చెడ్డ పేరు తెచ్చేందుకే ఈ కుట్ర పన్నారని ఆరోపించారు. నడ్డా పర్యటనకు రాష్ట్ర ప్రభుత్వాన్ని ఆ పార్టీ ఎలాంటి భద్రతా కోరలేదన్నారు. ప్రజలకు భాజపా నచ్చకపోతే తామేం చేస్తామంటూ మమత మేనల్లుడు, ఆ పార్టీ ఎంపీ అభిషేక్‌ వ్యాఖ్యానించారు.

ఇవీ చదవండి..
జేపీ నడ్డా కాన్వాయ్‌పై రాళ్ల దాడి
దుర్గామాత దీవెనలే నన్ను రక్షించాయి: నడ్డా