Paralympics: స్వర్ణ పతక విజేత అవనికి జగన్‌, చంద్రబాబు అభినందనలు

అమరావతి: టోక్యో పారాలింపిక్స్‌ షూటింగ్‌ విభాగంలో స్వర్ణ పతకం సాధించిన అవని లేఖరాకు సీఎం జగన్‌, తెదేపా అధినేత చంద్రబాబు అభినందనలు తెలిపారు. అత్యున్నత స్థాయి ప్రతిభ కనబరిచి సాధించిన ఈ విజయం భారత క్రీడా చరిత్రలో మైలురాయిగా నిలుస్తుందని జగన్‌ కొనియాడారు. అవనితో పాటు పతకాలు సాధించిన క్రీడాకారులందరికీ అభినందనలు తెలిపిన ఆయన.. భారత్‌ మరిన్ని పతకాలు సాధించాలని ఆకాంక్షించారు. పారాలింపిక్స్‌లో భారత్‌ తరఫున స్వర్ణ పతకం సాధించిన తొలి మహిళగా అవని నిలిచిందని చంద్రబాబు ట్వీట్‌ చేశారు. మన క్రీడాకారులు వివిధ విభాగాల్లో పతకాలు గెలిచి చరిత్ర సృష్టించారన్నారు.