దిల్లీ: 2014 నుంచి ఇప్పటిదాకా 296 మొబైల్‌ యాప్‌లను బ్లాక్‌ చేసినట్టు కేంద్రం వెల్లడించింది. దేశ భద్రత, సార్వభౌమత్వం, సమగ్రతను దృష్టిలో ఉంచుకొని ఈ చర్యలు తీసుకున్నట్టు కేంద్ర ఐటీశాఖ సహాయ మంత్రి సంజయ్‌ ధోత్రె రాజ్యసభలో వెల్లడించారు. ఐటీ చట్టం- 2000లోని 69ఏ సెక్షన్‌ నిబంధనల ప్రకారం ఈ యాప్‌లపై చర్యలు తీసుకున్నట్టు తెలిపారు. ఆండ్రాయిడ్‌, ఐవోఎస్‌ వేదికల్లో లభ్యమవుతున్న కొన్ని చైనా యాప్‌లు సమాచారాన్ని తస్కరించి దుర్వినియోగానికి పాల్పడుతున్నాయన్న సమాచారం మేరకు ఈ నిషేధం విధించినట్టు చెప్పారు. చైనాతో సరిహద్దుల్లో ఉద్రిక్తతలు నెలకొన్న వేళ జాతీయ భద్రతను దృష్టిలో ఉంచుకొని ఈ నిర్ణయం తీసుకున్నట్టు తెలిపారు. దేశంలో ఇంటర్నెట్‌ వినియోగదారుల సంఖ్యతో పాటు యాప్‌లు, వెబ్‌సైట్ల సంఖ్య కూడా బాగా పెరిగినట్టు చెప్పారు. కేంద్ర ప్రభుత్వం ఇప్పటికే వ్యక్తిగత డేటా పరిరక్షణ బిల్లు-2019ను తీసుకొచ్చిందని, అయితే, ఇది జేపీసీ పరిశీలనలో ఉందన్నారు. ఈ బిల్లు ద్వారా భారత పౌరుల  సమాచార గోప్యత, ప్రయోజనాలకు రక్షణ లభిస్తుందని తెలిపారు.

ఇదీ చదవండి..

ప్రపంచవ్యాప్తంగా 4,000 కొత్త కరోనా రకాలు!