ఈ ‘హ్యాండ్‌ వాష్‌ డ్యాన్స్’ చూశారా..?

ఇంటర్నెట్‌ డెస్క్‌: ప్రపంచాన్ని కలవరపెడుతున్న కరోనా వైరస్‌ను చేతులు శుభ్రంగా కడుక్కోవడం ద్వారా దూరం పెట్టొచ్చని ప్రపంచ ఆరోగ్య సంస్థ సహా వైద్య నిపుణులు సూచిస్తున్నారు. దీంతో చేతులు ఎలా శుభ్రం చేసుకోవాలి.. ఎంత సేపు కడుక్కోవాలి.. అన్న అంశాల్ని వివరిస్తూ చాలా మంది వీడియోలు చేస్తున్నారు. ఈ క్రమంలో వియత్నాంకు చెందిన ఇద్దరు డ్యాన్సర్లు ఇటీవల చేసిన ‘హ్యాండ్‌ వాష్‌ డ్యాన్స్‌’ అందరినీ ఆకట్టుకుంటోంది. లయబద్ధంగా వస్తున్న పాటకు స్టెప్పులు వేస్తూ చేతుల్ని శుభ్రం చేసుకునే విధానాన్ని టిక్‌టాక్‌ వేదికగా వివరించారు. వీరి ప్రయత్నాన్ని యూనిసెఫ్‌ అభినందించింది.

‘‘వీరు చేసిన హ్యాండ్‌ వాషింగ్‌ డ్యాన్స్‌ మాకు బాగా నచ్చింది. కరోనా నుంచి మనల్ని మనం రక్షించుకోవాలంటే మనం తీసుకోవాల్సిన తొలి జాగ్రత్త సబ్బుతో చేతులు కడుక్కోవడమే’’ అంటూ ట్విటర్‌లో వారి వీడియోను షేర్‌ చేసింది. మరి ఆలస్యం ఎందుకు మనమూ ఓ లుక్కేద్దామా..! చూడ్డమే కాదు.. తరచూ చేతులు శుభ్రం చేసుకొని వైరస్‌ ముప్పు నుంచి తప్పించుకుందాం!