గజరాజా లేవవా.. ఏనుగుల అరణ్యరోదన.. 

పాలక్కడ్‌: కేరళలో హృదయవిదారకమైన ఘటన చోటుచేసుకుంది. తోటి ఏనుగు నిర్జీవంగా పడి ఉండగా.. మరో గజరాజు దాన్ని లేపడానికి యత్నించింది. విద్యుదాఘాతానికి గురై చనిపోయిన ఏనుగును లేపేందుకు ఆ ఏనుగు చేసిన ప్రయత్నం హృదయాల్ని ద్రవింపజేసింది. పాలక్కడ్ జిల్లాలోని మలంపుళాలో సోమవారం రాత్రి విద్యుత్ తీగ తగిలి ఒక మగ ఏనుగు మృత్యువాత పడింది. అది గుర్తించిన తోటి ఏనుగులు.. చనిపోయిన ఏనుగును లేపేందుకు విశ్వ ప్రయత్నాలు చేశాయి. కాలితో, తొండంతో అటూ ఇటూ తిప్పుతూ లేవమని పిలుస్తున్నట్టుగా ఉన్న దృశ్యాలు హృదయాల్ని ద్రవింపజేస్తున్నాయి. కొన్ని గంటలపాటు అక్కడే ఉన్న తోటి ఏనుగులు ఎవరినీ ఆ పరిసర ప్రాంతాలకు రానివ్వలేదు. ఆ ఏనుగులన్నీ అక్కడి నుంచి వెళ్లిపోయేంత వరకు వేచి చూసిన అటవీ అధికారులు ఆ తర్వాత.. చనిపోయిన ఏనుగును తీసుకెళ్లి దహన సంస్కారాలు నిర్వహించారు.