Gujarat: 15 మత్స్యకారుల పడవలు గల్లంతు.. రంగంలోకి నావికాదళం!

గాంధీనగర్‌: గుజరాత్‌ గిర్‌ సోమనాథ్‌ జిల్లాలోని ఉనా హార్బర్‌ సమీపంలో గురువారం సుమారు 15 చేపలవేట పడవలు గల్లంతయ్యాయి. చేపల వేటకు వెళ్లి తిరిగి వస్తుండగా.. వాతావరణ పరిస్థితులు ప్రతికూలంగా మారడంతో ఈ ప్రమాదం జరిగినట్లు సమాచారం. ఈ ఘటనలో సుమారు 10 నుంచి 15 మంది మత్స్యకారులు గల్లంతై ఉండొచ్చని స్థానికులు తెలిపారు. వారి సమాచారంతో అప్రమత్తమైన అధికారులు వెంటనే సహాయక చర్యలు మొదలుపెట్టారు.

హెలికాప్టర్‌తో గాలింపు చర్యలు..

భారత నావికాదళం హెలికాప్టర్‌ సాయంతో గాలింపు చర్యలు చేపడుతోంది. అయితే, కనిపించకుండా పోయిన మత్స్యకారుల్లో నలుగురు సురక్షితంగా తీరానికి చేరుకున్నట్లు సమాచారం. ప్రమాదం జరిగిన ప్రాంతంలో బలమైన ఈదురుగాలులు, భారీ వర్షాలకు అవకాశం ఉందని వాతావరణశాఖ ఇప్పటికే హెచ్చరించింది. మత్స్యకారులు సముద్ర వేటకు వెళ్లొద్దని సూచించింది.