Sexual Harassment:  అమ్మాయిలపై వేధింపులను అడ్డుకున్న మహిళాపోలీస్‌పై వేధింపులు

చెన్నై: అమ్మాయిల్ని వేధించొద్దని వారించిన మహిళా పోలీస్‌పైనే ఆకతాయిలు లైంగిక వేధింపులకు పాల్పడిన ఘటన చెన్నైలో చోటు చేసుకుంది. ఈ ఘటనపై ఆమె ఫిర్యాదు చేయడంతో ఇద్దరు వ్యక్తుల్ని పోలీసులు అరెస్టు చేశారు.  ముత్తురామలింగ తేవార్‌ జయంతి సందర్భంగా నందనంలో పలు కార్యక్రమాలు జరిగాయి. 24 ఏళ్ల మహిళా పోలీస్‌ కానిస్టేబుల్‌ ఈ కార్యక్రమానికి బందోబస్తు విధులకు హాజరయింది. కాగా.. జనసందోహంలో ఇద్దరు ఆకతాయిలు అమ్మాయిల్ని వేధించడం గమనించిన ఆమె.. వారిని వారించింది. అయినా వారి ఆగడాలు ఆగలేదు. దీంతో వారిని మరోసారి హెచ్చరించబోయిన కానిస్టేబుల్‌పై ఆ ఇద్దరు వ్యక్తులు దురుసుగా ప్రవర్తిస్తూ.. లైంగిక వేధింపులకు పాల్పడ్డారు. ఊహించని ఈ ఘటన పట్ల ఆగ్రహానికి గురైన ఆమె.. ఈ విషయాన్ని అక్కడే విధుల్లో ఉన్న తోటి పోలీసుల దృష్టికి తీసుకెళ్లింది. దీంతో వారిద్దరినీ పోలీసులు జనాల మధ్యలో నుంచి బయటకు లాగి.. స్థానిక పోలీసులకు అప్పగించారు. మహిళా కానిస్టేబుల్‌ ఫిర్యాదు మేరకు పోలీసులు వారిపై కేసు నమోదు చేసి జైలుకు తరలించారు.