Crime News: దారుణం.. 15 ఏళ్ల బాలుడికి ఇలాంటి ఆలోచనా..!

21 ఏళ్ల యువతిపై అత్యాచార యత్నం

తిరువనంతపురం: 15 ఏళ్ల వయసులో కేరళకు చెందిన ఓ బాలుడు ప్రవర్తించిన తీరు నివ్వెరపరుస్తోంది. అతడిని పురికొల్పిన పరిస్థితులు తీవ్ర ఆందోళన కలిగిస్తున్నాయి. మలప్పురం జిల్లాకు చెందిన 15 ఏళ్ల బాలుడు.. 21 ఏళ్ల యువతిపై అత్యాచార యత్నానికి పాల్పడ్డాడు. సోమవారం మధ్యాహ్నం ఈ ఘటన చోటుచేసుకొంది. పోలీసులకు అందిన ఫిర్యాదు ప్రకారం.. బాధితురాలు కంప్యూటర్ క్లాస్‌కు వెళ్తున్న విషయాన్ని గమనించిన నిందితుడు ఆమెను అనుసరించాడు. ఆ సమయంలో పెద్దగా జనసంచారం కూడా లేదు. అదే అదునుగా చూసి, ఆమెను సమీపంలోని నిర్మానుష్య ప్రదేశానికి లాక్కెళ్లాడు. ఆమె తలపై రాయితో కొట్టి, చేతుల్ని దుప్పట్టాతో కట్టేశాడు. ఆ తర్వాత ఆమె గొంతు నొక్కి.. అత్యాచారం చేసేందుకు యత్నించాడు. అయితే ఆమె ప్రతిఘటించి సమీపంలోని ఇంటికి పరిగెత్తింది. 

ఈ ఘటనపై మంగళవారం పోలీసులకు ఫిర్యాదు అందడంతో విషయం వెలుగులోకి వచ్చింది. వెంటనే అప్రమత్తమైన పోలీసులు..ఆ బాలుడిని అదుపులోకి తీసుకొని జువైనల్ జస్టిస్ బోర్డు ముందు హాజరుపర్చారు. అనంతరం జువైనల్ హోంకు తరలించారు. ‘మేం ఆ యువతితో మాట్లాడాం. అంతకు ముందు ఎప్పుడూ అతడిని చూడలేదని చెప్పింది. మేం సేకరించిన సమాచారం ఆధారంగా అతడిని ప్రశ్నించనున్నాం’ అని వెల్లడించారు. ప్రస్తుతం బాధితురాలు షాక్‌లో ఉండటంతో పూర్తి వివరాలు చెప్పలేకపోతోందన్నారు. మరోపక్క, ఆ బాలుడికి మార్షల్ ఆర్ట్స్‌లో ప్రవేశం ఉన్నట్లు తెలుస్తోంది.