Kerala: మూఢనమ్మకాలకు 11 ఏళ్ల బాలిక బలి 

కన్నూర్‌: ఎంతటి రోగాన్నైనా నయం చేయగల స్థాయికి వైద్య రంగం అభివృద్ధి చెందినప్పటికీ.. నేటికీ కొందరు మూఢనమ్మకాలతో ప్రాణాలపైకి తెచ్చుకుంటున్నారు. తీవ్ర అనారోగ్యానికి గురైన కుమార్తెను ఆసుపత్రికి తీసుకెళ్లకుండా.. ప్రార్థనలు, మంత్రాలతో నయమవుతుందని నమ్మి ఆ బాలిక మృతికి కారణమయ్యాడో తండ్రి. ఈ సంఘటన కేరళలోని కన్నూర్‌లో జరిగింది. కన్నూర్‌కు చెందిన ఎంఏ సత్తార్‌ కుమార్తె ఫాతిమా(11) కొద్ది రోజుల క్రితం తీవ్ర జ్వరంతో అనారోగ్యానికి గురైంది. సత్తార్‌ తన కుమార్తెను ఆసుపత్రికి తీసుకెళ్లకుండా మత గురువు ఉవాయిస్‌ దగ్గరికి తీసుకెళ్లాడు. మతపరమైన ప్రార్థనలు, క్షుద్రపూజలతో నయం చేయాలని కోరాడు. సరైన సమయంలో చికిత్స అందక ఆ బాలిక ప్రాణాలు కోల్పోయింది. ఈ సంఘటనపై సమాచారం అందుకున్న పోలీసులు.. సత్తార్‌తో పాటు మత గురువును అరెస్ట్‌ చేశారు. బాలిక తీవ్రమైన శ్వాసకోస వ్యాధితో బాధపడుతోందని, సరైన సమయంలో ఆసుపత్రిలో చికిత్స అందించి ఉంటే బతికేదని పోస్ట్‌మార్టం నివేదికలో తేలింది.