Crime News: ఇస్మార్ట్‌ దొంగలు 

ఇంటర్నెట్‌ డెస్క్: చెన్నైలోని వేలచేరి, ధరమణి, వలసరవక్కం, రామాపురం ప్రాంతాల్లో దొంగలు స్టేట్‌ బ్యాంక్‌ ఆఫ్‌ ఇండియా ఏటీఎం యంత్రాలను లక్ష్యంగా చేసుకుని నగదు కాజేస్తున్నారు. దొంగతనం జరిగినట్టు కూడా తెలియకుండా తెలివిగా ఏటీఎంలను కొల్లగొడుతున్నారు. బ్యాంకు అధికారుల లెక్కల్లో డిపాజిట్‌ యంత్రాల్లోని సొమ్ము లక్షల్లో గల్లంతైనట్టు తేలడంతో ఈ విషయం వెలుగులోకి వచ్చింది. యంత్రాలలో డిపాజిట్‌ చేసిన నగదు, ఏటీఎం నుంచి తీసిన డబ్బుతో టాలీ కాకపోవడంతో అధికారులు గ్రేటర్‌ చెన్నై పోలీసులను ఆశ్రయించారు. దీనిపై కేసు నమోదు చేసిన పోలీసులు దర్యాప్తు చేపట్టారు. 

ఏటీఎం యంత్రాల్లో చిన్న లోపాన్ని కనిపెట్టిన దొంగలు తెలివిగా ఈ దొంగతనాలు చేసినట్లు పోలీసుల ప్రాథమిక దర్యాప్తులో తేలింది. చోరీకి గురైన ఏటీఎంలు జపాన్‌కు చెందిన ఓ సంస్థ తయారు చేసినట్లుగా పోలీసులు గుర్తించారు. ఏటీఎం యంత్రాల్లో పిన్‌ ఎంటర్ చేశాక డబ్బు తీయడానికి 20 సెకన్ల వ్యవధి ఉంటుంది. ఈ లోపు నగదు తీసుకోకపోతే అది ఏటీఎంలోకి వెళ్లిపోతుంది. దొంగలు 20 సెకన్ల వరకూ నగదు తీసుకోకుండా చేతిలోనే పట్టుకుంటారు. యంత్రం ఆ డబ్బును ఉపసంహరించుకునే సమయం అయిపోయాక తీసుకుంటున్నారు. ఈ విధంగా చేయడం వల్ల నగదు తీసినట్టు యంత్రం నమోదు చేయలేదనీ, దీనిపై మరింత లోతుగా దర్యాప్తు చేపట్టి నిందితులను పట్టుకుంటామని పోలీసులు తెలిపారు.