చూపు సమస్యలతో కుంగుబాటు ముప్పు

చూపు సమస్యలతో బాధపడుతున్నారా? వీలైనంత త్వరగా సరి చేసుకోవటం మంచిది. దీంతో మున్ముందు హాయిగా జీవించేలా చూసుకోవచ్చు. మధ్యవయసులో చూపు సమస్యలతో మహిళలకు కుంగుబాటు (డిప్రెషన్‌) ముప్పు పెరుగుతున్నట్టు బయటపడింది మరి. సాధారణంగా మగవారి కన్నా ఆడవారిలో కుంగుబాటు ఎక్కువ. మధ్యవయసు మహిళల్లో ఇది మరింత ఎక్కువగానూ చూస్తుంటాం. చూపు సమస్యలు గలవారికి దీని ముప్పు ఇంకాస్త అధికంగా ఉంటున్నట్టు యూనివర్సిటీ ఆఫ్‌ మిషిగన్‌ పరిశోధకుల అధ్యయనం పేర్కొంటోంది. మధ్యవయసులో చూపు తగ్గటం, శుక్లాల వంటి సమస్యలు తరచూ కనిపిస్తుంటాయి. ఇవే కాదు.. శుక్లాలు, డయాబెటిక్‌ రెటినోపతీ, మాక్యులా క్షీణించటం వంటి తీవ్ర, దీర్ఘకాల సమస్యలూ వేధిస్తుంటాయి. వీటిని వీలైనంత త్వరగా గుర్తించి, తగు చికిత్స తీసుకోవటం మంచిదని పరిశోధకులు సూచిస్తున్నారు. దీంతో కుంగుబాటునూ తగ్గించుకోవచ్చని చెబుతున్నారు. లేకపోతే కుంగుబాటు మున్ముందు దీర్ఘకాల సమస్యలకు దారితీసే ప్రమాదముందని గుర్తుచేస్తున్నారు.