close

సమీక్ష

‘అమ్మ’ కథలు

అమ్మ గుర్తొస్తే ఎవరికైనా హృదయం ఆర్ద్రమైపోతుంది, అమ్మ గురించి రాయని కవులూ రచయితలూ ఉండరేమోనంటారు ఈ పుస్తక రచయిత్రి. యాభైమందికి పైగా ప్రముఖులు తమ తల్లి గురించి చెప్పిన విషయాలన్నిటినీ క్రోడీకరించి ఈ పుస్తకాన్ని ప్రచురించారు. ‘అమ్మ దుఃఖంలో నా బాల్యం తడిసిపోయింది’ అన్నారు దాశరథి రంగాచార్య. ‘అమ్మ స్మృతి ఓ దివ్వె’ అంటారు డాక్టర్‌ ఎన్‌.గోపి.
‘అమ్మ త్యాగం నా కలానికి కన్నీళ్లు అద్దింది’ అన్నారు సీఎస్‌ రావు. అమ్మ కంట మనవల్ల ఒక దుఃఖాశ్రువు రాలినా, అరకోటి శాపాలతో సమానమని రంగనాథ్‌ అంటే ‘మా అమ్మ నాకు జన్మతో పాటు ధన్యతనీ ఇచ్చింది’ అంటారు ఓలేటి పార్వతీశం. ఇలా తల్లుల్ని తలచుకుని, వారు చేసిన త్యాగాలకు కళ్లు చెమర్చుకుని అక్షరాల్లో అంజలి ఘటించారు పలువురు. ఈ కన్నబిడ్డల గుండెచప్పుడు పాఠకులకూ బాల్యాన్ని గుర్తుచేస్తుంది.

- పద్మ

తల్లీ నిన్ను తలంచి
రచన: డా।।సి.భవానీదేవి
పేజీలు: 257: వెల: అమూల్యం
ప్రతులకు: ఫోన్‌- 040 27636172

చదివించే కథలు

మనిషి ప్రవర్తనలోని వైరుధ్యాలకు అద్దం పట్టే కథలివి. సులభంగా సాగే శైలీ బిగువైన కథనంతో ఆసక్తికరంగా చదివిస్తాయి. అకారణంగా ఓ మనిషిని ద్వేషించడం, ఆలోచన లేకుండా తోచింది చేసేయడం వంటి చర్యలు ఎంతటి విపరీత పరిణామాలకు దారితీస్తాయో ‘డియర్‌’ కథ కళ్ళకు కడుతుంది. ఆధునిక సమాజంలోని అవినీతి విశృంఖలత్వాన్ని ‘అయిమూల’ కథ ద్వారా వివరించారు. నేరప్రవృత్తి ఉన్న వ్యక్తులు తమకు ఉపకారం చేసినవారినే ఊబిలోకి ఎలా దించుతారో ‘మేం’ కథలో ప్రసన్న పాత్ర ద్వారా విశ్లేషించారు. అలల పందిరి, ఒంటి ఊపిరి, ముళ్ళనీరు, గచ్చుపొద, ఇరుకువైశాల్యం... కథలూ మానవ ఉద్వేగాలను కేంద్రంగా చేసుకున్నవే. వాస్తవికతకు దగ్గరగా ఉన్న కథావస్తువులు పాఠకులను ఆలోచింపజేస్తాయి.

- నీలి వేణుగోపాల్‌

డియర్‌ (కథలు)

రచన: బి.పి.కరుణాకర్‌
పేజీలు: 164: వెల: రూ.120/-
ప్రతులకు: ఫోన్‌-9290828575

మంచుదొంగల కథ

ఓ జంట రచయితల రష్యన్‌ నవలకు ఇది అనువాదం. ఈ సైన్స్‌ ఫిక్షన్‌ రచన ఉద్దేశాలు రెండు. ఒకటి- శాస్త్రీయ ఆలోచనారీతిపై అవగాహన పెంపు. రెండు- సాంకేతిక పదజాలాన్ని తెలుగులో మరింత ప్రచారానికి తేవడం.
గ్లేషియాలజీ శాస్త్రం ఆధారంగా సాగే నవల సన్నివేశాల స్థలం... అంటార్కిటికా. ఎగిరే సాసర్లలాగా ఎక్కడినుంచో గులాబీ రంగు మేఘాల జీవరాశి నేలపైకి చేరుతుంది. వాటి అన్వేషణకి వెళ్లిన భారతీయ శాస్త్రవేత్తలు- ఆ మేఘాలు అంటార్కిటికాలోని మంచును పెద్దఎత్తున అంతరిక్షానికి తీసుకెళ్లడాన్ని గమనిస్తారు. వాటి గుట్టురట్టు చేసేందుకు శాస్త్రజ్ఞులు ఏం చేశారన్నదే కథ. సైన్సులో ఆసక్తి ఉన్నవారిని తుదిదాకా చదివిస్తుందీ పుస్తకం.

- శరత్‌

గులాబి మేఘాలు (సైన్సు కాల్పనిక నవల)
రచన: అలేక్సాందర్‌, సిర్గేయ్‌ అబ్రామోవ్‌
అనువాదం: చట్టి శ్రీనివాసరావు
పేజీలు: 245: వెల: రూ.200/-
ప్రతులకు: విశాలాంధ్ర పుస్తకకేంద్రాలు

చిక్కు ముడులు

మహామంత్రి విక్రముడు, సేనాధిపతి సమరసేనుడు కుట్ర పన్ని జయపురం రాజ్యాన్ని ఆక్రమించుకుంటారు. వారి కుట్ర నుంచి మహారాజు చిన్నకుమారుడు రంజిత్‌ను కోశాధికారి రక్షిస్తాడు. రంజిత్‌ పెద్దవాడై రాజ్యానికి రావడంతో కథ మొదలవుతుంది. కొత్త కొత్త వ్యక్తులు పరిచయమవుతుంటారు. ప్రతి పరిచయంలోనూ వసంత పేరు తెరపైకి వస్తుంటుంది. ఇంతకీ ఈ వసంత ఎవరు, ఆమెకు రాజ్యంతో సంబంధం ఏమిటి, రాజ్యాన్ని రంజిత్‌ ఎలా సొంతం చేసుకున్నాడు... అనేది అసలు కథ. చాలా పాత్రల అసలు స్వరూపం చివర్లోనే తెలుస్తుంది. పలు మలుపులతో సాగే కథలో చిక్కుముడులను విప్పుకుంటూ చదవడాన్ని ఆస్వాదించేవారికి నచ్చే పుస్తకం.

- శివప్రసాద్‌

పద్మవ్యూహం (జానపద గాథ)
రచన: కనకమేడల
పేజీలు: 199, వెల: రూ.150/-
ప్రతులకు: ప్రధాన పుస్తకకేంద్రాలు

 

ఇంకా..

జిల్లా వార్తలు

దేవ‌తార్చ‌న

రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.