close
అప్పడం వేయించేద్దాం..!

అప్పడం వేయించేద్దాం..!

  తెలుగువాళ్లకి అప్పడం... కన్నడిగులకి హప్పల, తమిళులకి అప్పలం... కేరళీయులకి పాపడం...ఉత్తరాదిన పాపడ్‌... ఎవరు ఎలా పిలిచినా అది లేందే చాలామందికి భోజనం రుచించదు. అందునా పప్పు, దప్పళం, రసం, సాంబారు అన్నం తినాలంటే అందులోకి అప్పడం తప్పనిసరి. అందుకే పల్లెల్లో వేసవికాలంలో ఇంటి చుట్టుపక్కలవాళ్లంతా కలిసి సరదాగా కబుర్లు చెప్పుకుంటూ నిల్వ పచ్చళ్లూ వడియాలూ పట్టుకోవడం, అప్పడాలు ఒత్తుకోవడం చేస్తుంటారు. సెలవులు కాబట్టి పిల్లలు ఉండలూ బిళ్లలూ చేసివ్వడం, వాటిని ఆరబెట్టడం, లెక్కపెట్టడం... లాంటి పనులతో పెద్దవాళ్లకి ఉడత సాయం చేసేవారు. అంతా కలిసి ఆ పనిని ఏదో కష్టంగా కాకుండా ఇష్టమైన వేడుకలా చేసుకునేవారు. క్రమంగా టీవీల ప్రభావంతో స్వయంగా ఇంట్లో చేసుకోవడం మానేసినా బజారులో కొనుక్కుని అయినా వాటిని తింటున్నారుగానీ అప్పడాన్ని మాత్రం మరిచిపోవడం లేదు. ఇంకా చెప్పాలంటే గతంలోకన్నా మరిన్ని రుచుల్లో అప్పడాల్ని ఆస్వాదిస్తున్నారు. ఎందుకంటే అప్పడం తయారీలో ఇంటింటికీ వైవిధ్యం ఉంటుంది. ఇక, ప్రాంతాలవారీగా చూస్తే ప్రత్యేకంగా చెప్పనక్కర్లేదు. ఒక్కో ప్రాంతంలో ఒక్కో రకంగా చేస్తారు. అప్పట్లో తమకు వచ్చిన రకాన్నే చేసుకునేవారు. మహా అయితే అప్పడాలతో బాటుగా అదే పిండితో గుండ్రంగానో లేదా పొడవాటి చెక్కల మాదిరిగానో అప్పడం పూలను మాత్రం మనదగ్గర చేసేవారు. కానీ ఇటీవల భిన్న ప్రాంతాల్లో చేసే అప్పడాలన్నీ మార్కెట్లో కొలువుదీరుతున్నాయి. దాంతో రూపాయిబిళ్ల నుంచి చపాతీ సైజు వరకూ విభిన్న పరిమాణాల్లోనూ రంగుల్లోనూ రుచుల్లోనూ ఇవి దొరుకుతున్నాయి.
ఎక్కడెక్కడ?
ఉత్తరాదిన రాజస్థాన్‌, మహారాష్ట్ర; దక్షిణాదిన తమిళనాడు, కేరళ రాష్ట్రాలు అప్పడాల తయారీకి పెట్టింది పేరు. ముఖ్యంగా తమిళనాడులోని చింతామణి, జైహిందుపురం, కాంచీపురం ప్రాంతాలు అప్పడాల తయారీకి ఎంతో ప్రాచుర్యం పొందాయి. మలయాళీలు పూరీల్లా పొంగే అప్పడాల్ని చేస్తే, పనసపండునూ వీటి తయారీలో వాడటం కన్నడిగుల ప్రత్యేకత. బంగాళాదుంపల అప్పడాల తయారీలో కాశీ ప్రజలు సిద్ధహస్తులు.
ఎలా చేస్తారు?
తెలుగు రాష్ట్రాల్లో ఎక్కువగా మినప్పప్పు, పెసరపప్పులతోనే అప్పడాలు తయారుచేస్తుంటారు. కానీ ఉత్తరాదిన మాత్రం సెనగపప్పు, బియ్యం, బంగాళాదుంపలతోనూ చేస్తుంటారు. వీటిని మెత్తని పిండిలా పట్టించి అందులో ఉప్పు, వంటసోడాతోబాటు మిర్చిరసం, జీలకర్ర, ఇంగువ, నువ్వులు, వెల్లుల్లి, మిరియాలు... ఇలా రకరకాల పదార్థాలను వేసి, తగినన్ని నీళ్లలో కలిపి, నూనెతో మెత్తగా మర్దిస్తారు. పిండి బాగా నానాక చిన్న ఉండల్లా చేసి గుండ్రని కర్రతో పలుచని అప్పడాన్ని వత్తి నీడలోనే ఆరనిచ్చి డబ్బాలో నిల్వచేసేవారు. పిండి కలిపే పాళ్లూ అందులో వాడే సుగంధద్రవ్యాలను బట్టి అప్పడం రుచి ఉంటుంది. మలయాళీలు మినప్పప్పుని ఉడికించి చల్లారాక మెత్తగా రుబ్బి, అప్పడం చేస్తారు. ఆ తరవాత మరో అప్పడం చేసి దానిమీద పెట్టి మళ్లీ కర్రతో వత్తుతారు. ఇలా చేసిన ఈ అప్పడాలన్నీ పూరీల మాదిరిగా పొంగుతాయి.
ఉత్తరాదిన సెనగపిండిలో కాస్త మైదా, మినప్పిండి కలిపి చేసే అప్పడాలను ఎండబెట్టకుండానే అప్పటికప్పుడు కూడా వేయించుకుని తింటుంటారు. అయితే ఇటీవల అప్పడాలతోనూ రకరకాల వంటకాలు చేస్తున్నారు. వాటిని భోజనంలోనే కాకుండా స్నాక్స్‌లానూ తింటున్నారు. అప్పడాలను మంటమీద కాల్చుతున్నప్పుడే కావల్సిన ఆకారంలో మడిచి అందులో భేల్‌పూరీ, సేవ్‌పూరీల్లాంటి వాటిని నింపి అందిస్తున్నారు. రాజస్థానీయులైతే అప్పడాలను విభిన్న ఆకారాల్లో మడిచి వాటిని చాట్‌లో భాగంగానే ఎక్కువగా తింటుంటారు. పచ్చి అప్పడాలను కూరల్లోనూ వేస్తుంటారు. వేయించి పంచదారతో కలిపి పొడి చేసి లడ్డూలూ తయారుచేస్తుంటారు. స్ప్రింగ్‌రోల్స్‌లో మాదిరిగానే పచ్చి అప్పడాల్లో కూరగాయముక్కల్ని నింపి పాపడ్‌ రోల్స్‌ లాంటివీ చేస్తున్నారు. ఇలా అప్పడాన్ని అప్పడంలా మాత్రమే కాదు, విభిన్న రుచుల్లో ఆస్వాదిస్తున్నారు. అందుకే కరకరలాడే అప్పడం రుచి రోజురోజుకీ పెరిగిపోతూనే ఉంది... భోజనప్రియుల్ని చవులూరిస్తూనే ఉంది.


అప్పడం మంచిదేనా?

సంస్కృతంలో పర్పటాగా పిలిచే అప్పడం గురించి యోగరత్నాకర వైద్య గ్రంథంలో ప్రత్యేకంగా ప్రస్తావించారు. నూనెలో వేయించకుండా కాల్చే అప్పడం అజీర్తికి బద్ధ శత్రువులాంటిదట. ఆకలినీ పుట్టిస్తుందట. అయితే అప్పట్లో అప్పడాల్లో ప్రస్తుతం వాడుతోన్న సోడాఉప్పుకి బదులుగా సర్జక్షారాన్ని వాడేవారట. ఇప్పుడు కూడా ఆయుర్వేద వనమూలికలు అమ్మే షాపుల్లోనూ పచారీకొట్లలోనూ ఈ క్షారం దొరుకుతుంది. దీంతో చేసిన అప్పడం అజీర్తిని తగ్గిస్తుందట. అప్పడాల్లో వాడే సీమ మిరపకాయలకారంవల్ల కీళ్లనొప్పులు తగ్గుతాయనీ, మలబద్ధకంతో బాధపడేవాళ్లకీ ఇది ఎంతో మంచిదనీ, వూపిరితిత్తుల వ్యాధులు ఉన్నవాళ్లకి కూడా మేలు చేస్తుందనీ చెబుతారు. అలాగే పేగులో పుండ్లను తగ్గించే గుణం కూడా దీనికి ఉందట.
అదీగాక పూర్వం మినప్పిండి, పెసరపిండితోబాటు కందులు, ఉలవలు, సెనగలు, అలసందలతో కూడా అప్పడాలు తయారుచేసేవారు. మినప్పిండికన్నా పెసరపిండితో చేసేవి తేలిగ్గా అరుగుతాయనీ; కాస్త వగరు రుచితో ఉండే కంది అప్పడాలు తరచూ వేడి చేసేవాళ్లకి మంచివనీ, సెనగ అప్పడాలు శ్లేష్మాన్ని తగ్గిస్తాయనీ, అలసందల అప్పడాలు బాలింతలకు ఉపకరమనీ, ఉలవలతో చేసేవి పక్షవాతం, కీళ్లనొప్పులతో బాధపడేవాళ్లకి మేలనీ ఆయుర్వేద నిపుణులు చెబుతుంటారు. కొన్ని ప్రాంతాల్లో గోధుమపిండిలో సర్జక్షారంతోబాటు మిగిలినవన్నీ వేసి పుల్కాల్లా చేసి ఎండబెట్టి అవసరం అయినప్పుడు కాల్చుకునే గోధుమ అప్పడాల్నీ చేస్తుంటారు. ఇవి తేలిగ్గా అరగడంతోబాటు రుచిగానూ ఉంటాయట. అందుకే అప్పట్లో వాళ్ల శరీర గుణాన్ని బట్టి ఆయా రకాలు చేసుకునేవారట. అయితే అప్పడాన్ని వేయించడం కన్నా కాల్చి తింటే మంచిదనీ, అందులోనూ కాల్చిన వాటికి నెయ్యి రాసుకుని తింటే మరీ మంచిదన్నది ఆయుర్వేర నిపుణుల భాష్యం.

ఇంకా..

జిల్లా వార్తలు

దేవ‌తార్చ‌న

రుచులు
+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers
Terms & Conditions   |   Privacy Policy
Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.