close
ఫ్యాక్టరీ వ్యర్థాలతో ఐఐటీని కట్టేశారు!

వ్యర్థాలతో కట్టింది ఏ ఐఐటీ అంటారా... మన తిరుపతి ఐఐటీయే! ఏ వ్యర్థాలని అడుగుతున్నారా... రసాయన ఎరువుల తయారీ తర్వాత మిగిలిపోయే ‘ఫాస్ఫో-జిప్సం’ అనే వ్యర్థం. ఏడాదికి టన్నులకొద్దీ కొండలా పేరుకుపోయే ఈ వృధా రసాయనాన్ని నిర్మాణరంగంలో ఉపయోగిస్తున్నారిప్పుడు. ‘గ్లాస్‌ ఫైబర్‌ రీ-ఎన్‌ఫోర్స్‌డ్‌ జిప్సమ్‌’ (జీఎఫ్‌ఆర్‌జీ) అనే ఈ సాంకేతికత ఇప్పుడిప్పుడే మనదేశంలో ప్రాచుర్యాన్ని అందుకుంటోంది. దీని ప్రయోగానికి మన తెలుగురాష్ట్రాలే తొలి వేదికలయ్యాయి!

భవన నిర్మాణంలో ముందే సిద్ధం చేసిన సిమెంటు బోర్డులూ, ప్యానల్స్‌ వాడటం మనదగ్గర కొత్తేమీ కాదు. జీఎఫ్‌ఆర్‌జీ కూడా అలాంటి రెడీమేడ్‌ గోడల తయారీకి సంబంధించిన సాంకేతికతే కానీ ఇందులో సిమెంటు ఉండదు. అయినా ఇది వాటికంటే దృఢంగా ఉండటమే కాదు పర్యావరణానికీ ఏ హానీ చేయదు. అందుకే కేంద్ర గృహ, పట్టణ వ్యవహారాల శాఖకి చెందిన బిల్డింగ్‌ మెటీరియల్‌ టెక్నాలజీ ప్రమోషన్‌ కౌన్సిల్‌(బీఎంటీపీసీ) ఈ కొత్త తరహా నిర్మాణాలని ప్రోత్సహిస్తోంది. నెల్లూరులోని వెంకటాచలంలో నిరుపేదలూ, మధ్యతరగతి ప్రజల కోసం అతిపెద్ద గృహసముదాయాన్నీ ఈ సాంకేతికతతో నిర్మించి ఇచ్చింది. దేశంలో జీఎఫ్‌ఆర్‌జీతో నిర్మించిన తొలి భారీ గృహనిర్మాణాలు ఇవే! రెండో భారీ నిర్మాణం... ఐఐటీ-తిరుపతి క్యాంపస్‌. రేణిగుంట-ఏర్పేడు మధ్య మేర్లపాక గ్రామంలో ఐదువందల ఎకరాల్లో నిర్మిస్తున్న ఈ సువిశాల ప్రాంగణంలో ప్రతి కట్టడాన్నీ జీఎఫ్‌ఆర్‌జీ ప్యానల్స్‌తోనే నిర్మిస్తున్నారు. ఇప్పటికే నాలుగు అంతస్తులతో కూడిన నాలుగు హాస్టల్‌ భవనాలూ, రెండు అంతస్తుల రెసిడెన్షియల్‌, సెక్యూరిటీ బ్లాక్‌లని కట్టేశారు. కేవలం పద్నాలుగు నెలల్లోనే ముగించారు. ఒకప్పుడు ఎరువుల కర్మాగారాల్లో ఓ కాలుష్యకొండలా పేరుకుపోయిన ఈ జిప్సమ్‌ వ్యర్థాలు... ఇప్పుడిలా ఇంతపెద్ద పెద్ద కట్టడాల నిర్మాణానికి ప్రధాన వనరుగా ఉపయోగపడుతుండటం మనదేశ నిర్మాణ రంగాన్ని ఆశ్చర్యంలో ముంచెత్తుతోంది!

ఇదెలా సాధ్యమైందంటే...
రసాయన ఎరువుల తయారీలో భాగంగా పెద్దఎత్తున ఫాస్ఫో-జిప్సమ్‌ వ్యర్థాలు మిగిలిపోతుంటాయి. మనదేశంలో రోజుకి రెండువేల కిలోల వంతున ఏడాదికి ఏడులక్షల టన్నులుగా ఇది పేరుకుపోతోందని ఓ అంచనా. కొన్ని ఎరువుల ఫ్యాక్టరీల బయట ఓ చిన్నసైజు పర్వతంలాగే ఈ వ్యర్థాలు కనిపిస్తుంటాయి. దీనివల్ల చుట్టుపక్కల భూములు కలుషితమవుతున్నాయి.
ఈ ఫాస్ఫో-జిప్సమ్‌కి అతిసన్నటి గాజు తీగల్ని కలపడం ద్వారా దృఢమైన ఫలకాల్ని తయారుచేయడమే జీఎఫ్‌ఆర్‌జీ సాంకేతికత. అలా తయారైన ఫలకాల్ని పెద్ద రెడీమేడ్‌ గోడలుగా ఉపయోగించి భవనాలు నిర్మిస్తారు. ‘ర్యాపిడ్‌ వాల్స్‌’ అనే ఆస్ట్రేలియా కంపెనీ ఈ సాంకేతికతని నిర్మాణరంగంలో వాడటం మొదలుపెట్టింది. కాకపోతే, వీటిని అక్కడ భవనాల్లో పాక్షికంగానే ఉపయోగిస్తూ వచ్చారు. అలాకాకుండా, వాటిని భవన నిర్మాణంలో ప్రతి అడుగులోనూ ఉపయోగించేలా చూడాలని... ఐఐటీ-మద్రాసు 2012లో ప్రయోగాలు చేపట్టి విజయం సాధించింది. అలా మార్పులు చేసిన సాంకేతికతతో సరికొత్త జీఎఫ్‌ఆర్‌జీ ప్యానల్స్‌ను ఉపయోగించి 2013లో తమ క్యాంపస్‌లో కేవలం నాలుగురోజుల్లోనే ఓ అపార్ట్‌మెంట్‌ను నిర్మించి సంచలనం సృష్టించింది. ఈ సాంకేతికతను ఎవరైనా ఉపయోగించుకుని భవనాలు నిర్మించుకోవచ్చని కేంద్ర ప్రభుత్వం కూడా అనుమతులిచ్చింది.

ఇదీ వీటి ప్రత్యేకత...
నిర్మాణవ్యయం పరంగా ప్రస్తుతం సంప్రదాయ భవనాలకీ, జీఎఫ్‌ఆర్‌జీ నిర్మాణాలకీ పెద్ద తేడా ఉండదు. కాకపోతే ఇసుక, సిమెంటుతో నిర్మించిన భవనాలు కొన్నేళ్ల తర్వాత పెచ్చులూడటం, నీళ్లు లీకవ్వడం వంటి సమస్యలు వస్తుంటాయి. జీఎఫ్‌ఆర్‌జీ ప్యానెల్స్‌కి అలాంటి సమస్యేదీ ఉండవంటోంది ఐఐటీ మద్రాసు. అలా దీర్ఘకాలంలో ఎలాంటి మరమ్మతులూ ఉండవుకాబట్టి ఆ మేరకు వ్యయం తగ్గినట్టేనని ఆ సంస్థ చెబుతోంది. ఒక్క పునాది వేసేటప్పుడు తప్ప జీఎఫ్‌ఆర్‌జీ భవనాలకి సిమెంటూ, ఇసుకా అక్కర్లేదు. ఈ గోడలపైన ప్రత్యేకంగా ప్లాస్టరింగ్‌ చేయక్కర్లేదు.
వేసవిలో చల్లదనాన్నీ, చలికాలంలో వెచ్చదనాన్నీ ఇచ్చేలా దీన్ని ఐఐటీ-మద్రాసు తీర్చిదిద్దింది. పైగా, సిమెంటూ ఇటుకలతో నిర్మించిన భవనాలకైతే భారీ ఖర్చుతో భూకంపాల ముప్పురాకుండా ప్రత్యేక ఏర్పాట్లు చేస్తున్నారిప్పుడు. జీఎఫ్‌ఆర్‌జీ నిర్మాణాలు అలాంటి ఏర్పాట్లు ఏవీ లేకుండానే 8.5 రిక్టర్‌ స్కేలు దాకా భూకంపాన్ని తట్టుకుంటాయి. అంతేకాదు, వెయ్యి డిగ్రీల ఫారన్‌హీటుదాకా నిప్పుని నిరోధిస్తాయి. సంప్రదాయ భవనాలకంటే వీటి నిర్మాణానికి సగంకన్నా తక్కువ కాలం పట్టడమే కాదు... వాటికన్నా ఐదురెట్లు దృఢంగా ఉంటాయట.
ఐఐటీ-మద్రాసు దేశంలోని వివిధ స్థిరాస్తి నిర్మాణ సంస్థలకి దీనిపైన శిక్షణ ఇస్తోంది. అక్కడ శిక్షణ తీసుకున్న డజనుకుపైగా సంస్థలు దేశవ్యాప్తంగా జీఎఫ్‌ఆర్‌జీ తరహా భవనాలని నిర్మించి ఇస్తున్నాయి. ఇవన్నీ కలిపి ప్రస్తుతం దేశవ్యాప్తంగా మూడొందలకు పైచిలుకు భవనాలని నిర్మించాయి. వీటిల్లో ఎక్కువగా ఆంధ్రప్రదేశ్‌, తెలంగాణ, తమిళనాడు, కర్ణాటకల్లో కట్టినవే. చెన్నైలో సిటీరెన్‌ సంస్థ, హైదరాబాద్‌లో జీఎఫ్‌ఆర్‌జీ కన్‌స్ట్రక్షన్‌, ర్యాపిడ్‌ వాల్‌ వంటి సంస్థలూ మధ్యతరగతి అవసరాలకి తగ్గట్టు రెండు, మూడంతస్తుల భవనాలని నిర్మించి ఇస్తున్నాయి!

22 సెప్టెంబరు 2019

ఇంకా..

జిల్లా వార్తలు

దేవ‌తార్చ‌న

రుచులు
+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers
Terms & Conditions   |   Privacy Policy
Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.