close
Facebook Share Twitter Share WhatsApp Share Telegram Share

ఆకుపచ్చని తివాచీ... కూర్గ్‌..!

పచ్చని దుప్పటి కప్పుకున్న కొండల్నీ లోయల్నీ చూస్తూ, వాటి మధ్యలో నుంచి గాల్లో తేలుతూ వచ్చే కాఫీ పరిమళాన్నీ యాలకుల సువాసనల్నీ ఆఘ్రాణిస్తూ, తలమీదుగా ప్రయాణించే మేఘాల్ని పట్టుకోవాలని ఆశపడుతూ, ఎగసిపడే జలపాతాల జల్లులో తడుస్తూ... ‘స్కాట్‌ల్యాండ్‌ ఆఫ్‌ ఇండియా’గా పేరొందిన కూర్గ్‌ పరిసరాల్లో పర్యటిస్తుంటే కాలమే తెలియలేదు అంటున్నారు దిల్లీకి చెందిన శాంతిశ్రీ బెనర్జీ.

కర్ణాటక రాష్ట్రంలోని ఓ జిల్లా పేరే కూర్గ్‌ లేదా కొడగు. జిల్లా కేంద్రం మడికేరి. మా అమ్మాయితో బెంగళూరు నుంచి బస్సులో మడికేరి చేరేసరికి తెల్లవారిపోయింది. ట్యాక్సీలో హోటల్‌కి బయలుదేరాం. చీకటి తెరలు తొలగి వెలుగురేఖలు పరచుకుంటున్నాయి. కొండల మధ్యలో ప్రయాణిస్తుంటే, చుట్టూ ఉన్న అటవీ సౌందర్యం మైమరిపించింది. కూర్గ్‌లో ప్రతి రెండు కిలోమీటర్లకీ లోయల్లోనో కొండలమీదో ఉన్న కాఫీతోటల మధ్యలో రిసార్టులు ఉంటాయి. మా హోటల్‌ కూడా ఓ కొండమీద ఉండటంతో ఎంతో సంబరపడ్డాం. చుట్టూ పచ్చదనం పరచుకున్న కాఫీ తోటలతోనూ రకరకాల చెట్లతో ఎంతో అందంగా ఉందా ప్రదేశం. సింహంలాంటి ఓ పెద్ద కుక్క, రెండు చిన్న కుక్కలు ఆ హోటల్‌కి కాపలాగా ఉన్నాయి. అక్కడున్న చౌకీదార్‌ దీపక్‌ అస్సామీ వ్యక్తి. మమ్మల్ని సాదరంగా లోపలకు తీసుకువెళ్లాడు.

మా హోటల్‌ చిన్న ఇల్లులా చుట్టూ పూలచెట్లతో అందంగా ఉంది. అక్కడే కొన్ని కుటీరాలూ, వాటికి కాస్త దూరంలో డేరాలూ ఉన్నాయి. దగ్గరలోనే రెండు చిన్న కొలనుల్లో బాతులు తిరుగుతున్నాయి. ఆ కొండమీద అలా నడుచుకుంటూ ముందుకు వెళితే అన్నీ కాఫీతోటలే. ఎర్రని కాయలతో కాఫీ కొమ్మలు భారంగా ఊగుతున్నాయి. కాఫీ తోటలని దాటుకుని ముందుకు వెళితే అంతా అడవే. యాలకుల చెట్లు, నిటారుగా ఆకాశంలోకి అల్లుకున్న సిల్వర్‌ ట్రీస్‌ వాటికి అల్లుకున్న మిరియాల తీగలనూ చూశాం. దగ్గరలో జలపాతం ఉందని చెప్పడంతో కొండదిగి అక్కడికి వెళ్లాం. కాసేపు గడిపిన తరవాత టాక్సీలో మడికేరికి చేరుకున్నాం. పట్టణం మధ్యలో ఉన్న రెండంతస్తుల కోటకు వెళ్లాం. దీన్ని క్రీ.శ.1600-1834 మధ్యలో ఈ ప్రాంతాన్ని పాలించిన కొడగు రాజుల్లో ఒకడైన ముద్దురాజు మట్టితో నిర్మించాడట. ఆ తరవాత టిప్పుసుల్తాన్‌ రాతి కట్టడంగా మార్చాడు. 1834లో ఆంగ్లేయులు దీన్ని స్వాధీనం చేసుకుని కోటకు దగ్గరలో ఉన్న వీరభద్రస్వామి గుడిని పడగొట్టి, చర్చిని కట్టించారు. గోథిక్‌ శైలిలో కట్టిన ఈ చర్చిని తరవాతికాలంలో ఆర్కియాలజీ విభాగం సంగ్రహాలయంగా మార్చింది. అందులో ఇండియన్‌ ఆర్మీలో మొదటి భారతీయ కమాండర్‌-ఇన్‌-ఛీఫ్‌గా పనిచేసి, కూర్గ్‌ ప్రజల గుండెల్లో సుస్థిరస్థానాన్ని ఏర్పరచుకున్న కె.ఎం.కరియప్ప చిత్రపటంతోబాటు అనేక కళాఖండాలు ఉన్నాయి.   నిజానికి ఈ కొడగు ప్రజలదో ప్రత్యేకమైన జాతి. తెల్లగా అందంగా ఉండే కూర్గ్‌ ప్రజల సంస్కృతీ సంప్రదాయాలన్నీ భిన్నంగానే ఉంటాయి. రెండువేల సంవత్సరాల క్రితమే ఇక్కడకు వచ్చిన విదేశీ యుద్ధ తెగకు చెందినవారని కొందరూ; వెడల్పాటి తల కలిగిన ఓ తెగ ఆర్యులకన్నా ముందే మొహంజొదారోకి వచ్చి అక్కడి నుంచి కూర్గ్‌కి వచ్చి స్థిరపడి, వ్యవసాయం చేసుకుంటూ జీవించడం ప్రారంభించిందనీ మరికొందరూ అంటుంటారు. మొత్తమ్మీద వీళ్లదో ప్రత్యేక జాతి. ప్రకృతినీ పూర్వికుల్నీ ఆరాధిస్తారు. ఆచారవ్యవహారాలన్నీ ప్రత్యేకంగా కనిపించినా ఆతిథ్యంలో మాత్రం వాళ్లకు వాళ్లే సాటి.

హిందూ ఆలయం ఇస్లాం శైలిలో...
అక్కడినుంచి ఓంకారేశ్వర్‌ ఆలయానికి వెళ్లాం. దీన్ని కొడగు రాజైన రెండో లింగరాజేంద్ర క్రీ.శ. 1820లో కట్టించాడట. అయితే గుడిని ఇస్లాం, గోథిక్‌ రీతుల్ని కలగలిపి నిర్మించడం ఆశ్చర్యం కలిగించింది. లింగరాజేంద్ర పొరబాటున ఓ బ్రాహ్మణుణ్ణి హత్య చేశాడనీ పాపపరిహారంకోసం కాశీ నుంచి లింగాన్ని తెచ్చి ప్రతిష్ఠించాడనీ చెబుతారు. గుడికి మధ్యలో పెద్ద డోమ్‌, నలువైపులా మినార్లూ ఉన్నాయి. గుడికి ఎదురుగా తటాకం, తటాకం మధ్యలో మండపం ఉండి చిత్రంగా అనిపించింది. తరవాత రాజుల సమాధుల దగ్గరికి వెళ్లాం. వాటిని అక్కడ గడ్డిగే అంటారు. ఆవరణలో ఇండో-సార్సెనిక్‌ పద్ధతిలో కట్టిన మూడు సమాధులు ఉన్నాయి. హిందువులైన కొడగు రాజులు సమాధులు కట్టుకోవడం చకితుల్ని చేస్తుంది.

అందమైన సూర్యాస్తమయం
అక్కడికి 8 కిలోమీటర్ల దూరంలో ఉన్న అబ్బే జలపాతం చూడ్డానికి వెళ్లాం. కాఫీ తోటలూ సుగంధద్రవ్యాల మొక్కలతో నిండిన ప్రదేశం మధ్యలో ఉన్న జలపాతాన్ని ఎంతచూసినా తనివితీరదు. కొండకు దిగువన ఉన్న ఈ జలపాతం చూడ్డానికి చాలా మెట్లు దిగి వెళ్లాలి. అయినా దిగి జలపాతాన్ని చూస్తూ చాలాసేపు గడిపాం. అక్కడే కాఫీ, యాలకుల ప్యాకెట్లు కొనుక్కున్నాం.

తరవాత రాజాస్‌ సీట్‌ అనే ప్రదేశానికి వెళ్లాం. చుట్టూ కొండలూ పచ్చనిలోయలూ వరిపొలాలూ ఉన్న ఆ ప్రదేశంలో ఓ ఉద్యానవనాన్ని నిర్మించారు. కొడగు రాజులు భార్యలతో సహా అక్కడికి వచ్చి సూర్యాస్తమయ దృశ్యాన్ని చూసేవారట. అందుకే దానికా పేరు. నిజంగానే ఆ ప్రదేశం నుంచి చూస్తే సూర్యాస్తమయం అద్భుతంగా తోచింది. మర్నాడు మడికేరి నుంచి భాగమండలానికి బయలుదేరాం. కొండల మధ్యలోఉన్న అడవిదారుల్లో కాసేపు ప్రయాణించాం. అవన్నీ కచ్చారోడ్లు కావడంతో నెమ్మదిగా వెళ్లాం. కానీ చుట్టూ ఉన్న అడవుల్ని చూస్తూ ప్రయాణించడం వల్ల అస్సలు విసుగనిపించలేదు. గంటలో కావేరీ నది ఒడ్డున ఉన్న భాగమండలానికి చేరుకున్నాం. ఇక్కడి కావేరీ నదిలో కనిక, సుజ్యోతి అనే రెండు చిన్న నదులు కలుస్తాయి. అందుకే దీన్ని త్రివేణీ సంగమం అనీ అంటారు. భక్తులు ముందుగా ఈ త్రివేణీ సంగమంలో స్నానంచేసి పితృదేవతలకి పూజలుచేసి, కావేరి జన్మస్థలమైన తలకావేరిని దర్శిస్తుంటారు. అక్కడినుంచి దగ్గరలోనే ఉన్న భాగండేశ్వర గుడికి వెళ్లాం. దీన్ని క్రీ.శ.పదకొండో శతాబ్దానికన్నాముందు చోళులు కట్టించినట్లు తెలుస్తోంది. ఆలయ ఆవరణలో నాలుగు చిన్నచిన్న గుడులు ఉన్నాయి. అవి వినాయకుడికీ శివుడికీ సుబ్రహ్మణ్యస్వామికీ విష్ణుమూర్తికీ సంబంధించినవి. గుడిలోని స్తంభాలకు సహజ రంగుల్ని వేశారట. సుబ్రహ్మణ్యస్వామి, విష్ణుమూర్తి గుడుల ముందున్న సభామండపాల్లోని చెక్క నగిషీలు ఎంతో అందంగా ఉన్నాయి.
భాగానంద మహర్షి ఇక్కడ తపస్సు చేసినట్లూ ఆ తపస్సుకి మెచ్చి శివుడు అతన్ని కరుణించినట్లూ ఓ కథ ప్రాచుర్యంలో ఉంది. బహుశా ఆ మహర్షి వల్లనే ఈ ప్రదేశానికి భాగమండలా అనే పేరు వచ్చి ఉండొచ్చు.

బ్రహ్మగిరి కొండమీద...
తరవాత భాగమండలానికి 8 కిలోమీటర్ల దూరంలో ఉన్న తలకావేరికి బయలుదేరాం. బ్రహ్మగిరి కొండమీద ఉన్న ఈ ప్రదేశం, కావేరీ జన్మస్థలంగా ప్రాచుర్యం చెందింది. అక్కడ మహానందిలో మాదిరిగానే నంది నోట్లో నుంచి సన్నటిధారగా నీళ్లు పడి, కింద ఉన్న తటాకంలోకి వెళుతున్నాయి. అదే కావేరీ నది ప్రారంభం. ఆ తటాకం నుంచి నీళ్లు భూమిలోపలికి ప్రవహించి, కొంతదూరం తరవాత కావేరీనది రూపంలో పైకి వచ్చాయని చెబుతారు. ఆ తటాకంలోనే కొందరు స్నానాలు చేస్తున్నారు. నీళ్లు చాలా చల్లగా ఉన్నాయి. మేం గుడి దాటుకుని మెట్లెక్కి పైకి వెళ్లాం. అక్కడ శివుడి గుడి, వినాయకుడి గుడి ఉన్నాయి. అందులో వెండితో చేసిన విగ్రహాలు మెరుస్తున్నాయి. దీనికి ఎడమ వైపున ఓ పెద్ద కొండ ఉంది. మెట్లెక్కి ఆ కొండపైనుంచి చూస్తే అద్భుతంగా అనిపించింది. ఈ కొండకి ఓ పక్కంతా కేరళ, మరోవైపు కర్ణాటక అందంగా కనువిందు చేస్తాయి.

మర్నాడు ఉదయాన్నే బయలుదేరి దుబారే క్యాంప్‌కి చేరుకున్నాం. అది మడికేరికి 29 కిలోమీటర్ల దూరంలోని నది మధ్యలో ఉన్న ద్వీపంలో ఉంది. పడవలో అక్కడికి వెళ్లాం. అక్కడ ఏనుగులకి మనుషులతో స్నేహంగా ఉండేలా శిక్షణ ఇచ్చారు. మనం అందించే గడ్డీ, బెల్లం ఇష్టంగా తింటున్నాయి. మరికొందరు ఏనుగులకి స్నానం చేయించే పనిలో ఉన్నారు. తరవాత పదిహేను కిలోమీటర్ల దూరంలో ఉన్న కావేరి నిసర్గధామానికి వెళ్లాం. అది కావేరీ నది మధ్యలో ఉన్న 64 ఎకరాల దీవి. టికెట్లు తీసుకుని వేలాడే ఇనుప వంతెన మీదుగా లోపలికి వెళ్లాం. లోపల చందనం, టేకు, వెదురు ఉన్నాయి.  తరవాత దీవిలో నుంచి బయటకు వచ్చి కారులో బైలకుప్పే గ్రామానికి చేరుకున్నాం. మనదేశంలో ధర్మశాల తరవాత ముఖ్యమైన టిబెటన్‌ స్థావరం ఇదే. ఇక్కడి నమ్‌ద్రోలింగ్‌ మొనాస్టరీని కిలోలకొద్దీ బంగారంతో నిర్మించారట. అందుకే దీన్ని గోల్డెన్‌ టెంపుల్‌ అనీ అంటారు. అక్కడి షాపుల్లో టిబెటన్‌ తినుబండారాలూ వాళ్లు తయారుచేసిన వస్తువులూ కొనుక్కుని తిరుగుప్రయాణమయ్యాం.

ఇంకా..

జిల్లా వార్తలు

దేవ‌తార్చ‌న

రుచులు
+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact :
040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

For Editorial Feedback - eMail: infonet@eenadu.net
For Digital Marketing enquiries Contact : 040 -
23318181 eMail :marketing@eenadu.net
Best Viewed In Latest Browsers
Terms & Conditions   |   Privacy Policy
Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.