close
Facebook Share Twitter Share WhatsApp Share Telegram Share
ఇవి కారు చేసిన రాళ్లు!

చ్చలూ కెంపులూ వజ్రాల్లాంటి విలువైన రాళ్లు మొదలు మార్బుల్స్‌, నాపరాళ్ల దాకా అన్నీ నేలలోనే దొరుకుతాయి. భూమి ఏర్పడటంలో భాగంగానో, భూకంపాలూ అగ్నిపర్వతాల విస్ఫోటనాల్లాంటి ఉపద్రవాల వల్లో ఇవి ఏర్పడతాయి. కానీ భూ చరిత్రలో భాగంగా కాకుండా మానవ చరిత్రలో భాగంగా ఏర్పడ్డ ప్రత్యేక రాయి ఫోర్డైట్‌. కార్లకు మనుషులే రంగులు వేసే కాలంలో, కింద పడిపోయిన ఎన్నో వర్ణాలు కలగలిసి ఏర్పడ్డ ఈ రాళ్లు నగలూ, కీ చెయిన్ల తయారీలో తమవైన ప్రత్యేకతను చాటుకుంటున్నాయి.

ఆరోజుల్లో...
ఆటోమొబైల్‌ రంగం అంతగా సాంకేతికతను అందిపుచ్చుకోని సమయంలో మనుషులే స్ప్రింక్లర్ల సాయంతో ఎనామిల్‌ రంగులను కార్లకు అద్దేవారు. కార్లన్నింటినీ ఓ వరుసలో పెట్టి వాటికి ఈ రంగులేసి వాటిని వేడి వాతావరణంలో ఆరబెట్టేవారు. ఇలాంటప్పుడు కార్లను ముందుకు జరిపేందుకు వాటి కింద కదిలే బెల్టును ఉంచేవారు. రంగులు వేసేప్పుడు కింద ఒలికిపోయిన పెయింటంతా పొరలా తయారయ్యేది... అలా రకరకాల రంగులు ఒకదానిమీద ఒకటి పడీ, ఒకదానితో మరొకటి కలిసీ చిత్రవర్ణాలు ఏర్పడేవి. తయారీలో భాగంగా కార్లతో పాటూ ఈ రంగులూ వేడి ఉష్ణోగ్రతల్లో ఏళ్లతరబడి ఉండటం వల్ల అచ్చం రాయిలా గట్టిపడిపోయాయి. ఇక, ఆ స్థలాన్ని శుభ్రం చేయడంలో భాగంగా కింది పొరలను తొలగించేందుకు ప్రయత్నించిన సిబ్బంది... ఇలా ఏర్పడ్డ రాయిని చూసి ఆశ్చర్యపోయారు. ఎందుకంటే అవి విభిన్నరంగుల్లో డిజైన్లతో ఉండటమే కాదు అచ్చం రాయిలాగే కోసి మెరుగుపెట్టడానికి అనువుగా ఉన్నాయి. మొదట వాటిని తలాకొన్నీ ఇళ్లకు తీసుకెళ్లారు. తరువాత అవి నగల దుకాణాలకు చేరాయి. ఫోర్డ్‌ సంస్థకు సంబంధించిన గ్యారేజీల నుంచి ముందుగా కనుగొనడం వల్ల దీన్ని ఫోర్డైట్‌ అనీ, ఇవి అమెరికాలోని కార్ల తయారీ పరిశ్రమలుండే డెట్రాయిట్‌ ప్రాంతంలో తయారవడంతో పాటూ దీనిలోని ప్యాట్రన్లు ఎగేట్‌ రాయిని పోలి ఉండటం వల్ల దీన్ని డెట్రాయిట్‌ ఎగేట్‌ అనీ... మోటార్‌ పరిశ్రమల ఉత్పత్తి కనుక మోటార్‌ ఎగేట్‌ అనీ పిలుస్తారు.

రకరకాల రంగులు కలిసి పోవడం వల్ల ఉన్న రంగులతో పాటూ కొత్త రంగులూ ఈ రాళ్లలో ఆవిష్కారమయ్యాయి. వాటిని కోసి, చక్కగా మెరుగుపెట్టి దానిమీద మరో గ్లాస్‌కోట్‌ వేసి లాకెట్లూ, చెవి దుద్దులూ, లోలాకులూ, ఉంగరాలూ, బ్రేస్‌లెట్లూ, కీచెయిన్లతోపాటు అలంకరణ రాళ్లు గానూ తయారు చేశారు కళాకారులు. దీంతో నగల ఖాన్‌దాన్‌లో మరో కొత్తరాయి వచ్చి చేరినట్లయింది. ఎంతో అందంగానూ ఉండటంతో పెట్టుకునేవాళ్లూ ఎక్కువయ్యారు. ఇంతకీ కార్లకు ఇప్పుడు యంత్రాలే అత్యాధునిక పద్ధతుల్లో రంగులద్దుతుండటంతో కొత్తగా ఈ రాళ్లు ఏర్పడట్లేదు. అయితే ఈ తరహా వస్తువులకు ఉన్న క్రేజ్‌ దృష్ట్యా కొన్ని జ్యువెలరీ తయారీ సంస్థల్లాంటివి, పాత పద్ధతుల్లోనే... రకరకాల రంగులను కలిపి, వేడి ఛాంబర్లలో ఉంచి తమ అవసరాలకు తగ్గ రాళ్లను తయారు చేసుకుంటున్నాయి. కానీ వీటికన్నా, ఆ కాలంలో ఏర్పడ్డ అసలైన రాళ్లకు మాత్రం ధర ఎక్కువ. ఆన్‌లైన్‌లో వివిధ సంస్థలు ఎన్నో డిజైన్లలో వీటిని అమ్ముతున్నాయి. మొత్తానికి ఫోర్డైట్‌... మనిషి తయారు చేసిన రాయి... మరి మనం పెట్టుకోకపోతే ఎలా?!


లిక్విడ్‌ నైట్రోజన్‌... ఆహార పదార్థాల తయారీలో దీని వాడకం ప్రపంచవ్యాప్తంగా ఇప్పుడో ట్రెండ్‌. అతి శీతల ఉష్ణోగ్రతలు ఉన్న ఈ ద్రవంతో చిటికెలో ఐస్‌క్రీం తయారైపోతుంది, క్షణంలో చాక్లెట్‌ గట్టిపడిపోతుంది, సెకన్లలో జ్యూస్‌ చల్లబడిపోతుంది. దీన్ని ఉపయోగించి చేసిన పదార్థాన్ని తయారైన వెంటనే నోట్లో వేసుకున్నామంటే నోట్లో నుంచీ ముక్కు నుంచీ వచ్చే పొగలు తినేవారినే కాదు చూసేవారినీ సంభ్రమాశ్చర్యాలకు గురిచేస్తాయి.

అమ్మో ఎంత చల్లనో...
నైట్రోజన్‌ బాష్పీభవన స్థానం -196 డిగ్రీల సెల్సియస్‌. ఈ ఉష్ణోగ్రత వద్ద ద్రవరూపంలో ఉండే నైట్రోజన్‌ని లిక్విడ్‌ నైట్రోజన్‌ అని పిలుస్తారు. ప్రపంచంలోనే అత్యంత చల్లని పదార్థాల్లో ఇది ఒకటి. నైట్రోజన్‌ వాయువును ఒత్తిడికి గురిచేసి చల్లబరచడం ద్వారా దీన్ని తయారుచేస్తారు. సాధారణంగా ప్రయోగశాలల్లోనూ, క్యాన్సర్‌ కణాలూ, కొన్ని చర్మసంబంధిత చికిత్సల్లాంటి వాటికే పరిమితమైన ఈ లిక్విడ్‌నైట్రోజన్‌ను ఇటీవల ఆహారపదార్థాల తయారీలోనూ ఉపయోగిస్తున్నారు. నిజానికి 1890ల్లోనే ఆగ్నెస్‌ మార్షల్‌ రాసిన ఫ్యాన్సీ ఐసెస్‌ అనే వంటల పుస్తకంలో ఐస్‌క్రీమ్‌ తయారీలో లిక్విడ్‌నైట్రోజన్‌ ప్రస్తావన కనిపిస్తుంది. అయితే అదంత ప్రాచుర్యంలోకి రాలేదు. ప్రఖ్యాత షెఫ్‌ హెస్టన్‌ బ్లు్లమెంథల్‌ ఇంగ్లండ్‌లోని బెర్క్‌షెయిర్లో నెలకొల్పిన తన ఫ్యాట్‌డక్‌ రెస్టరెంట్‌లో లిక్విడ్‌ నైట్రోజన్‌తో చేసే స్క్రాంబుల్డ్‌ ఎగ్‌ అండ్‌ బేకాన్‌ ఐస్‌క్రీమ్‌తోపాటూ కొన్ని రకాల పానీయాలకు విపరీతమైన డిమాండ్‌ వచ్చింది. ప్లేట్లో పొగలు చిమ్ముతూ కనిపించే ఈ పదార్థాలు నోటికీ రుచిగా ఉండటంతో ఫ్యాట్‌డక్‌ పేరు ఇంగ్లండంతా మారుమోగిపోయింది. అతి శీతల ద్రావణమైన ఈ లిక్విడ్‌ నైట్రోజన్‌ను ఐస్‌క్రీమ్‌ మిక్స్‌లో పోసి కలపగానే క్షణాల్లో ఐస్‌క్రీం తయారైపోతుంది. అదే పాప్‌కార్న్‌లో ఈ ద్రవాన్ని పోస్తే ఫ్రిజ్‌లో పెట్టిన మంచ్‌ చాక్లెట్‌లా కరకలాడతాయి. ఇక వీటిని నోట్లోవేసుకుంటే పొగలు పొగలే.

ఫ్యాట్‌డక్‌ క్లిక్‌ అవడంతో ప్రపంచంలోని అనేక పెద్ద రెస్టారెంట్లూ, కేఫ్‌లూ లిక్విడ్‌ నైట్రోజన్‌తో తమ ప్రయోగాలను మొదలుపెట్టాయి. పాప్‌కార్న్‌, పాప్‌సికల్స్‌, మాష్‌మెలోస్‌, చిప్స్‌, ట్వింకీస్‌, ఛాట్‌, సలాడ్‌, జ్యూసులూ, కాక్‌టెయిల్స్‌... ఇలా రకరకాల ఆహార పదార్థాలకు ఈ చల్లని ద్రవాన్ని కలిపి వచ్చిన వారికి వింతైన విందును అందిస్తున్నారు. ఈ మధ్యే లాస్‌ఏంజెలెస్‌లోని ఓ రెస్టారెంట్‌ సెరెల్‌బాల్స్‌కు లిక్విడ్‌ నైట్రోజన్‌ను కలిపి చేసిన ఐస్‌క్రీమ్‌ను ‘ద డ్రాగన్‌బ్రీత్‌’ పేరిట అమ్మడం మొదలుపెట్టింది. ఈ ఐస్‌క్రీమ్‌ను నోట్లో వేసుకొని ముక్కుతో గట్టిగా గాలి వదిలితే తెల్లని పొగలు బయటికి వస్తాయన్నమాట! ఇక ప్రఖ్యాత చాక్లెట్ల సంస్థ కిట్‌క్యాట్‌ త్వరలో ‘బిలో ఫ్రీజింగ్‌ చాకొలేటరీ’ పేరిట జపాన్‌లోని దైకన్యామాలో ఓ బొటిక్‌ను తెరవబోతోంది. అందులో -196 డిగ్రీ సెంటీగ్రేడ్‌ వద్ద కిట్‌క్యాట్‌ మరింత రుచిగా కరకరలాడుతూ ఉండబోతోందట. అయితే ఈ తరహా పదార్థాల తయారీ, వడ్డన అంతా పూర్తి నిపుణత కలిగిన వారి ద్వారానే జరుగుతోంది. నెట్లోనూ లిక్విడ్‌ నైట్రోజన్‌తో చేసే రకరకాల రెసిపీలు అందుబాటులో ఉన్నాయి. లిక్విడ్‌ నైట్రోజన్‌ను ఏ పదార్థంతో ఎంత సేపు కలపాలీ, తయారు చేసిన ఎంతసేపటి తరువాత తినొచ్చూ లాంటివి చాలా ముఖ్యం కనుక ఇలాంటి వాటిని ఇంటి దగ్గర ప్రయత్నించకపోవడమే మంచిది. అధిక మోతాదులో ద్రవ రూప నైట్రోజన్‌ శరీరానికి తగిలినా, లోపలికి వెళ్లినా ఆరోగ్యానికి హాని కలుగుతుంది. ఇంకొన్నాళ్లలోనే మన కేఫ్‌లూ ఈ తరహా వంటలను అందుబాటులోకి తెస్తాయి లెండి... అప్పుడు మనమూ పొగలూదేయొచ్చు... ఏమంటారు?!


 

ట్టి లేకుండా మొక్కల్ని పెంచలేమా అన్న ఆలోచనలోంచి పుట్టుకొచ్చిన విధానమే హైడ్రోపోనిక్స్‌. దీనికోసం రకరకాల పదార్థాలను వాడుతున్నారు. పోషకభరితమైన నీళ్లతోబాటు కొబ్బరి పీచూ, పీట్‌మాస్‌, పెర్లైట్‌... వంటి వాటిల్లోనూ మొక్కల్ని పెంచుతున్నారు. ఇప్పుడు క్లే పెబల్స్‌ కూడా వస్తున్నాయి. వీటినే మట్టిరాళ్లూ, మట్టి ఉండలూ అనీ అంటున్నారు. అచ్చంగా కుండీల్లో ఈ మట్టిరాళ్లని నింపి పెంచేవాళ్లు కొందరయితే, వీటిని కుండీల్లో అడుగున వేసి ఆ పైన వేరే పదార్థాలను నింపేవాళ్లు ఇంకొందరు. అలాగే ఉద్యానవనం అందంగా ఉండేందుకు వీటిని వాడేవాళ్లు కొందరయితే, మొక్క ఆరోగ్యంగా పెరగడానికి వాడేవాళ్లు మరికొందరు. ఇవి నీటిని కావాల్సినంత మేర పీల్చుకుని కుండీల్లో నీరు నిల్వలేకుండా చేస్తాయి. దాంతో వేళ్లు కుళ్లిపోవు. పైగా ఈ మట్టిఉండలు రంధ్రపూరితంగానూ తేలిగ్గానూ ఉంటాయి. దాంతో మొక్క వేళ్లు చక్కగా గాలి పోసుకుంటాయి. వీటివల్ల మొక్కకు తరచూ నీరు పోయక్కర్లేదు. ఎందుకంటే ఇవి తేలిగ్గానూ రంధ్రపూరితంగానూ ఉండటంతో అవి నీళ్లను బాగా పీల్చుకుని ఆ నీటిని వేళ్లకు అవసరమైనప్పుడు అందిస్తాయి. ఫలితంగా మొక్క వేళ్లు నీటిని వెతుక్కుంటూ కుండీ అడుగుభాగం వరకూ కూడా ప్రయాణించాల్సిన అవసరం ఉండదు. వర్షాల కారణంగా కుండీలో నీరు ఎక్కువైతే ఆ నీటిని పీల్చుకుని నిల్వ లేకుండా చూస్తాయి. మరీ ఎక్కువయితే వీటి మధ్యలోని ఖాళీలవల్ల కిందకి పోతాయి.

ఎలా తయారుచేస్తారు?
క్లే పెబల్స్‌... వీటి పేరులోనే మట్టి ఉంది. అంటే వీటినీ మట్టితోనే చేస్తారు. కానీ కాల్చిన మట్టితో తయారవుతాయి. అంటే ఇటుకల్ని కాల్చినట్లుగానే వీటిని కూడా బట్టీల్లోనూ భారీ మెషీన్లలోనూ బాగా ప్రాసెస్‌ చేసి అత్యధిక ఉష్ణోగ్రత సుమారు 1100 డిగ్రీల సెంటీగ్రేడు దగ్గర తయారుచేస్తారు. వీటిల్లో కొన్ని గుండ్రంగానూ మరికొన్ని పాప్‌కార్న్‌ మాదిరిగా విచ్చుకున్నట్లూ ఉంటాయి. వేడిచేయడం కారణంగా మట్టి ఉబ్బి రంధ్రపూరితం కావడంతో ఆ మట్టిలో ఆక్సిజన్‌ ఎక్కువగా ఉంటుంది. ఫలితంగా మొక్క వేర్లు వేగంగా వాటిల్లో నాటుకుంటాయి. ఒకవేళ తరవాత ఎప్పుడైనా ఈ హైడ్రోటోన్స్‌ని సాధారణ మట్టిలా వాడాలని అనుకుంటే వెడల్పాటి సుత్తిలాంటి పరికరాలతో వాటిని పగులగొట్టాల్సిందే మరి.అత్యధిక ఉష్ణోగ్రత దగ్గర తయారవడంవల్ల ఈ మట్టిరాళ్ల పీహెచ్‌ శాతం తటస్థంగా ఉంటుంది. దాంతో అన్ని రకాల మొక్కల పెంపకానికీ ఇవి సరిపోతాయి. పైగా వీటిని మళ్లీ మళ్లీ వాడుకోవచ్చు. ఆ రకంగా ఇవి పర్యావరణప్రియం కూడా. అయితే వీటిని కుండీల్లో వేసేటప్పుడు ఓసారి బాగా కడగాలి. దీనివల్ల ఫ్యాక్టరీలో తయారైనప్పుడు ఏదైనా మట్టి లాంటిది వీటికి అతుక్కుని ఉంటే అది పోతుంది. కిందకి కూడా మురికి రాకుండా ఉంటుంది. అలాగే వీటిలో మొక్కను నాటేముందు సుమారు 6-24 గంటలు నానబెట్టాలి. ఎందుకంటే ఇవి ఎంత నానితే అంతగా ఉబ్బుతాయి. అంటే అంత ఎక్కువగా నీటినీ పోషకాలనీ పీల్చుకుని మొక్కకు అందిస్తాయన్నమాట. అలాగే నీళ్లు పోసేటప్పుడు మొక్క చుట్టూ కనీసం మూడు అంగుళాల మేర ఉన్న మట్టిగుల్లలు పూర్తిగా తడిసేలా చూసుకోవాలి. మొత్తమ్మీద ఈ క్లే పెబల్స్‌ అనేవి మొక్క ఆరోగ్యంగా వేగంగా పెరగడానికి దోహదపడతాయి. అందుకే చేతికి మట్టి అంటకుండా ఏ టెర్రస్‌మీదో బాల్కనీల్లోనో ఉద్యానవనాన్ని పెంచాలనుకునేవాళ్లకు ఇవి చూడచక్కని ప్రత్యామ్నాయం.

ఇంకా..

జిల్లా వార్తలు

దేవ‌తార్చ‌న

రుచులు
+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact :
040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

For Editorial Feedback - eMail: infonet@eenadu.net
For Digital Marketing enquiries Contact : 040 -
23318181 eMail :marketing@eenadu.net
Best Viewed In Latest Browsers
Terms & Conditions   |   Privacy Policy
Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.