close
Facebook Share Twitter Share WhatsApp Share Telegram Share
అక్కడ... ప్రతి మగువా ఓ మాంచాల!

అక్కడ... ప్రతి మగువా ఓ మాంచాల!

ఆ ఊరి పేరు గూడెమైనా.. ఇరవైయేళ్లుగా కార్గిల్‌ గూడెం అనే పిలుస్తున్నారు. ‘ఈ గ్రామానికి చెందిన చాలామంది కార్గిల్‌ యుద్ధంలో పాల్గొన్నారు కాబట్టి ఆ పేరు వచ్చి ఉండొచ్చు..!’ అని ఊహిస్తున్నారు కదా! అది కొంతవరకు నిజమే కానీ పూర్తిగా కాదు. దీనికి ఆ పేరు రావడానికి కారణం అక్కడి స్త్రీలు. పాలకులు ఎవరైనా సరే, ఈ గ్రామంలోని మగవారు సైన్యంలో ఉండటం 250 ఏళ్లుగా కొనసాగుతున్నా.. కార్గిల్‌ యుద్ధం సమయంలో మాత్రం ఆ ఆనవాయితీ ఓ చక్కటి స్ఫూర్తిని నింపుకుంది. వచ్చే జూన్‌ నెలతో ఆ స్ఫూర్తి ఇరవై ఏళ్లలోకి అడుగుపెడుతుంది!ది 1999వ సంవత్సరం. జూన్‌ 14వ తేది. ఆ రోజు ఉదయం గూడెం గ్రామానికి చెందిన ఐదుగురు మహిళలు గ్రామపెద్ద జీవీరెడ్డి ఇంటికొచ్చారు. ‘ఏంటమ్మా ఏమైంది..?’ అని కంగారుగా అడిగారాయన. ‘ఈరోజు సాయంత్రం మన ఊర్లో పంచాయతీ పెట్టాలండీ..’ అని చెప్పారు. ‘సైన్యంలో పనిచేస్తున్న మావాళ్లు సెలవులపై వచ్చి.. ఇప్పుడక్కడ కార్గిల్‌లో యుద్ధం జరుగుతున్నా వెళ్లడం లేదండీ! పంచాయతీ పెట్టి వాళ్లని ఒప్పించాలి!’ అని చెప్పారు. వాళ్లు కోరినట్టే ఆ రోజు పంచాయతీ పెట్టారు. చదువున్నా లేకున్నా సరే.. ఆ మహిళలంతా ఆ సమావేశంలో చూపిన దేశభక్తి అందరి కళ్లమ్మట నీళ్లు తెప్పించింది.
ఒక్కొక్కరిదీ ఒక్కో కథ..
అరుణకుమారికి ఆ ఏడాది ఏప్రిల్‌ 30నే పెళ్లైంది. ఆ పెళ్లి కోసమే ఇంటికి వచ్చాడు వరుడు దుర్గాప్రసాద్‌. మూడు ముళ్ల అచ్చటా ముచ్చటా అయ్యాక ఆ అమ్మాయి మే నెల 18న తన అత్తారింటికి వెళ్లాలని నిశ్చయించారు. ఇంతలోపే కార్గిల్‌ నగారా మోగింది! పుట్టింటివాళ్లందరూ కుదేలైపోయారు. భర్త కూడా అన్యమనస్కంగానే ఉన్నాడు. కానీ అరుణ మాత్రం ‘భర్త వెళ్లి తీరాల్సిందే’నని పట్టుబట్టింది. ‘యుద్ధంలో మనదేశానికి విజయం దక్కిందనే వార్తతో నువ్వు తిరిగిరా! అప్పుడే మనకు నిజంగా పెళ్లి జరిగినట్లు’ అని తెగేసి చెప్పిందామె. పెళ్లయి నాలుగు నెలలైనా నిండని శ్రీదేవి కూడా ఇదే మాటపైనే నిలిచింది. రేవతికి ఇద్దరు పిల్లలు. పోస్ట్‌ గ్రాడ్యుయేషన్‌ చేసింది. ఆమె భర్త కూడా ఏప్రిల్‌లోనే సెలవుపై వచ్చాడు. తిరిగి వెళ్లడానికి సుముఖంగా లేడు. ‘నువ్వు వెళ్లడం కాదు.. పిలిస్తే ఇప్పటికిప్పుడే నీతోపాటూ రావడానికి సిద్ధం. అక్కడ మనిద్దరి ప్రాణాలు పోయినా.. ఈ దేశం నా పిల్లలని చల్లగా చూసుకుంటుందనే నమ్మకం నాకుంది!’ అని చెప్పింది.
తల్లులు కూడా..
లక్ష్మీదేవి భర్త రాజన్న తీవ్ర అనారోగ్యంలో ఉన్నాడు. ఆ విషయం తెలిసి సైన్యంలో పనిచేస్తున్న ఆమె కొడుకులు కృష్ణారావు, నారాయణరావులిద్దరూ వచ్చారు. ఇంతలో కార్గిల్‌ సంక్షోభం వచ్చేసింది. ‘చావుబతుకుల్లో ఉన్న నాన్నని వదిలి వెళ్లలేమమ్మా..’ అన్నారు వాళ్లు. ‘ఎంతకష్టమైనా సరే మీ నాన్నని నేను చూసుకుంటాను. దేశం కోసం పోరాడాల్సిన మీరు ఇలా ఇంట్లో ఉండిపోవడం తప్పు..’ అని చెప్పిందామె. ఆ వివాదం ఎటూ తేలకే పంచాయతీకి వచ్చారు ముగ్గురు. సరస్వతి తన కొడుక్కి పెళ్లి చేయాలనుకుని మార్చి నెలలో లేఖరాసింది. ఏప్రిల్‌కంతా వచ్చేశాడు. పెళ్లిచూపులు పూర్తై.. నిశ్చితార్థానికీ తేది నిర్ణయించారు. ఇంతలో మిలటరీ నుంచి పిలుపు. పరిస్థితి చెబితే పైవాళ్లు అర్థం చేసుకోగలరని చెబుతున్నాడతను. కానీ సరస్వతి వినిపించుకోలేదు. ‘కారణం ఏదైనా నువ్వు యుద్ధానికి వెళ్లకపోతే పిరికివాడికిందే జమచేస్తారు..’ అన్నది ఆమె వాదన. తూతా లక్ష్మీ కూడా అంతే. తనకున్న ఒక్కగానొక్క కొడుకు యుద్ధానికి వెళ్లితీరాల్సిందేనని పట్టుబట్టింది. మొత్తానికి నాటి పంచాయతీ మహిళల మాటనే నెగ్గించింది. సైనికులందరూ కార్గిల్‌కి పయనమయ్యారు. యుద్ధం ముగిశాక విజేతలుగా తిరిగొచ్చారు. అలా వచ్చినవారికి గ్రామం ఆ రోజు బ్రహ్మరథం పట్టింది. ఆ తర్వాతి ఏడాది నుంచి ఈ గ్రామంలో ఏటా కార్గిల్‌ రోజుని ఘనంగా జరుపుకుంటున్నారు.కార్గిల్‌ విజయం 20వ సంవత్సరంలోకి అడుగుపెడుతున్న సందర్భంగా ఉత్సవాలని మరింత ఘనంగా నిర్వహించబోతున్నారు. అప్పట్లో కార్గిల్‌ యుద్ధంలో పాల్గొన్నవారిలో పన్నెండుమంది రిటైర్‌ అయ్యారు. తమ భర్తలాగే పిల్లలూ సైన్యంలోకి వెళ్లేలా చూస్తామంటున్నారు ఈ మహిళలు.
రెండు దశాబ్దాలుగా...
శ్రీకాకుళం జిల్లా టెక్కలి మండలంలో ఉంటుంది ఈ గూడెం గ్రామం. దాదాపు రెండొందల సంవత్సరాల కిందట ఈ గ్రామంలోనివాళ్లు తర్లాకోట రాజు దగ్గర భటులుగా చేస్తుండేవారు. వీరి ధైర్యం, పరాక్రమాలు చూసి టెక్కలి రాజా తన రాజ్యంలోకి తీసుకున్నారు. మొదట్లో వచ్చినవాళ్లు ఇక్కడ గుడారాలు వేసుకుని ఉన్నందువల్ల ఈ ప్రాంతాన్ని గుడారం అని పిలిచేవారట. తర్వాత అదే గూడెంగా మారిందంటారు. టెక్కలి రాజుల కాలంలోనే మైసూరు-బ్రిటిష్‌ యుద్ధం సమయంలో టిప్పుసుల్తానుకి మద్దతుగా బ్రిటిష్‌వాళ్లపై యుద్ధం చేసిన చరిత్ర వీళ్లది. అప్పటి నుంచి ఇప్పటిదాకా, ప్రభుత్వాలు మారినా, వీరసైనికులుగానే ఉంటూ వస్తున్నారు. ఇప్పటికీ 45 మంది వివిధ స్థాయుల్లో సైనికులుగా పనిచేస్తున్నారు.  తమ తరతరాల సైనిక చరిత్రపై ‘గూడెం చరిత్ర.. వీర చరిత్ర’ అనే పుస్తకం కూడా రాశారు ఈ గ్రామానికి చెందిన ఓ మేజర్‌. ఆ పుస్తకాన్ని ఇప్పడు త్రివిధ దళాలకి చెందిన గ్రంథాలయాల్లో  ఉంచారు. ఇన్ని ఉన్నా.. కార్గిల్‌ యుద్ధం సమయంలోనే మహిళల చొరవే ఈ గ్రామానికి గుర్తింపు తెచ్చింది! ఇప్పుడే కాదు రెండో ప్రపంచయుద్ధం సమయం లోనూ ఇదేలాంటి పరిస్థితి వచ్చిందట. అప్పట్లో ‘నేనూ ఇలాగే యుద్ధానికి పోనని మొండికేశా. నా భార్య లక్ష్మీ నచ్చజెప్పాకే వెళ్లా..’ అని గుర్తుచేసుకుంటారు కొర్లాను అంకులు అనే ఎనభైయేళ్లమాజీ సైనికుడు!

- కరుకోల తాండవకృష్ణ, న్యూస్‌టుడే, ఎల్బీనగర్‌
ఫొటో: కీర్తికుమార్‌

ఇంకా..

జిల్లా వార్తలు

దేవ‌తార్చ‌న

రుచులు
+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact :
040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

For Editorial Feedback - eMail: infonet@eenadu.net
For Digital Marketing enquiries Contact : 040 -
23318181 eMail :marketing@eenadu.net
Best Viewed In Latest Browsers
Terms & Conditions   |   Privacy Policy
Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.