close
Facebook Share Twitter Share WhatsApp Share Telegram Share
వానల్లో వేసేద్దాం... జెల్లీ శాండల్స్‌!

వర్షాకాలం వచ్చిందంటే చాలు... చెప్పుల ఫ్యాషన్లకు ఫుల్‌స్టాప్‌ పెట్టేసి, ఏదో ఒక జెల్లీ చెప్పులతో సరిపెట్టుకునే రోజులు పోయాయి. చినుకుతడిలోనూ పాదాల అందాన్ని ద్విగుణీకృతం చేసే సరికొత్త పారదర్శక శాండల్స్‌తో మెరిసిపోవడమే తాజా ట్రెండ్‌ అంటున్నారు ఈతరం అమ్మాయిలు.
‘నీ కాళ్లను పట్టుకు వదలనన్నవి చూడే నా కళ్లు... ఆ చూపులనల్లా తొక్కుకు వెళ్లకు దయలేదా అసలు...’ అంటూ ఏ అబ్బాయైనా ఓ అమ్మాయి కాళ్లమీద మనసు పారేసుకున్నాడంటే అది కచ్చితంగా ఏ వానాకాలమో అయి ఉంటుంది. అందాల అమ్మాయిల పాదాలు మామూలుగానే అద్దంలా మెరుస్తుంటాయి. వానలో తడిసినప్పుడయితే మరీ ముద్దొస్తుంటాయి. అందుకే ఆ పాదాల్ని అంతే అందంగా కనిపించేలా చేసే ట్రాన్స్‌పరెంట్‌ శాండల్స్‌ మార్కెట్లో హల్‌ చల్‌ చేసేస్తున్నాయి. వాటిని అంతే ఇష్టంగా ధరించి తమ కాళ్ల సోయగానికి తామే మురిసిపోతున్నారు అమ్మాయిలు.

అలాగని ఈ జెల్లీ శాండల్స్‌ మరీ కొత్తవేం కాదు. నిన్నమొన్నటి వరకూ తక్కువ నాణ్యతతో పాక్షిక పారదర్శకంగా ఉండేవి. ఒకప్పుడు సముద్రంలో చేపల వేటకు వెళ్లేవాళ్లు ధరించేవారట. రెండో ప్రపంచ యుద్ధ సమయంలో తోలు దొరకకపోవడంతో ఫ్రాన్స్‌కు చెందిన జీన్‌ డ్యూఫాంట్‌ మొదటగా ప్లాస్టిక్కు చెప్పుల్ని తయారుచేశాడట. అవే రంగుల్ని నింపుకుని పాక్షిక పారదర్శకతతో జెల్లీ శాండల్స్‌గా వచ్చాయి. వాటినే ఇప్పుడు నాణ్యమైన ప్లాస్టిక్కూ గాజూ రెజినూ రెక్సినూ లెదరూ ... ఇలా అన్నింటినీ జోడిస్తూ ట్రాన్స్‌పరెంట్‌గా రూపొందిస్తున్నాయి అనేక కంపెనీలు. కొన్నింటిని అచ్చంగా ప్లాస్టిక్కుతోనే తయారుచేసి వాటికి రాళ్ల సొగసుల్ని అద్దితే, మరికొన్ని చెప్పుల్లో లెదర్‌ లేదా రెక్సిన్‌ను వాడినప్పటికీ అది వానలో తడిసినా పాడవకుండా ప్లాస్టిక్కు లేయరుతో అతికించడం లేదా రెజిన్‌ కోట్‌ వేయడం చేస్తున్నారు. అలాగే హీల్‌కి సైతం గాజు, రెజిన్‌ లేదా దృఢమైన ప్లాస్టిక్కునే వాడటంతో అవి అద్దాల్లా మెరుస్తున్నాయి. కొన్నింటిని చూస్తే పాదాన్ని పట్టి ఉంచే బెల్టులాంటి భాగం ఏదయినా ఉందా లేదా అన్న అనుమానమూ రాకపోదు. అలాగే చెప్పులకి అడుగున రెజిన్‌ను కంటెయినర్‌లా చేసి కృత్రిమ పూలనీ అమరుస్తున్నారు. ఏమైనా కోమలమైన పదాల సౌందర్యం తెలియాలంటే పారదర్శక పాదరక్షల్ని మించినవి ఏముంటాయి?!


తాగారా... సప్తవర్ణాల చాయ్‌

వర్షం పడుతుంటే కిటికీ దగ్గరో, బాల్కనీలోనో కూర్చుని చినుకుల సవ్వడిని ఆస్వాదిస్తూ... పొగలు కక్కే చాయ్‌ని తాగుతుంటే  కలిగే ఆనందమే వేరు. మరి చాయ్‌ అంటే మనకి తెలిసింది టీ పొడి, పాలు, నీళ్లు, పంచదార, అల్లం, యాలకుల వంటివి వేసి చేసుకునేది. అంతకుమించి రుచీ, రంగూ ఉండే కొన్నిరకాల చాయ్‌ల్ని తాగితేనే కాదు... చూస్తే కూడా అద్భుతంగానే అనిపిస్తుంది. ఇదిగో అలాంటి చాయ్‌ల కథాకమామీషు..!


హరివిల్లు చాయ్‌: చాయ్‌ని ఇష్టంగా తాగుతూ సరికొత్త రుచుల్లో కోరుకునేవారికి ఈ సప్తవర్ణాల చాయ్‌ భలేగా విందు చేస్తుంది. ఎందుకంటే ఏడు రంగుల్లో కనిపించడంతోపాటు ఏ రంగుకా రుచి ఉండటం దీని ప్రత్యేకత. అంతేకాదు, ఈచాయ్‌ తాగినప్పుడు ఒక పొర చల్లగా పలకరిస్తే... ఇంకో పొర నాలుకని చురుక్కుమనిపిస్తుంది. కోల్‌కతాతోపాటు ఈశాన్య రాష్ట్రాలు, కోయంబత్తూరు ప్రాంతంలో ఈ టీ దొరుకుతుంది. రకరకాల చోట్ల పండే తేయాకు, స్పైసీ సిరప్‌లు, సుగంధద్రవ్యాలను వేసి చేసే ఈ చాయ్‌లో ఏడు రంగులూ, రుచీ రావడానికి ఏం చేస్తారు అనేది తయారీదారులకు మాత్రమే తెలిసిన రహస్యం. ఏదైతేనేం, ఈసారి ఆ ప్రాంతాలకు వెళ్లినప్పుడు ఈ రెయిన్‌బో చాయ్‌ని ఆస్వాదించేయండి.


ఫెమినిస్ట్‌ చాయ్‌: మామూలు రోజుల్లో ఏమో కానీ వర్షాకాలం, చలికాలంలో మాత్రం టీచుక్క కోసం నాలుక తెగ తపించిపోతుంది. అలాంటి వాళ్లు ఒక్కసారి కశ్మీరు ప్రత్యేకమైన ఫెమినిస్ట్‌ చాయ్‌ని తాగి చూశారో ఇక వదలరు. పేరుకు తగ్గట్టుగానే ఈ చాయ్‌ చూడముచ్చటైన గులాబీ రంగులో కనిపిస్తూ నోరూరిస్తూ ఉంటుంది. ఆ వర్ణంలో రావడానికి ఏ కృత్రిమ రంగో కలుపుతారనుకుంటే పొరబాటే. తయారీలో టీపొడితోపాటు బాదం, పిస్తా పలుకులు, దాల్చినచెక్క, గులాబీ రేకలు వేస్తారు. గులాబీ రంగుకోసం అక్కడ దొరికే ఓ ప్రత్యేకమైన ఉప్పును వాడతారు. నూన్‌ చాయ్‌ అని కూడా పిలిచే ఈ టీ తాగినవారు అద్భుతః అద్భుతస్యః అనాల్సిందే.


తందూరి చాయ్‌: సుగంధద్రవ్యాల్నీ మట్టివాసన పరిమళాల్నీ కలగలిపి చేసేదే తందూరీ చాయ్‌. దీన్నే మట్కా చాయ్‌ అనీ పిలుస్తారు. అల్లం, శొంఠి, సుగంధద్రవ్యాలు, టీమసాలాలు, టీపొడి వేసి చిక్కని పాలతో కాస్తారు. తరవాత వేడి వేడి నిప్పులపైన కాల్చిన మట్టి కుండని ఇత్తడి పాత్రలో ఉంచి టీని అందులో పోస్తారు. కుండ వేడికి ఈ చాయ్‌ పొగలు కక్కుతూ బుసబుస పొంగుతూ ఇత్తడి పాత్రలోకి వస్తుంది. అలా వచ్చిన టీని మట్టి కప్పుల్లో ఇస్తారు. జీర్ణవ్యవస్థకు ఎంతో మేలు చేసే ఈ టీ వెనీలా, చాక్లెట్‌, లెమన్‌ వంటి ఫ్లేవర్లలోనూ దొరుకుతుంది. కేరళ ప్రాంతంలో ఈ టీలో నిమ్మగడ్డి, పుదీనా వంటివి వేస్తారు. కొన్ని చోట్ల కుంకుమ పువ్వు కలుపుతారు. తెలుగు రాష్ట్రాల్లోనూ పలు ప్రాంతాల్లో దొరికే ఈ చాయ్‌ని ఇంట్లో కూడా తయారు చేసుకోవచ్చు.


సులేమాని చాయ్‌: మలబారు తీరంలో చేపల బిర్యానీకి తోడుగా సులేమాని చాయ్‌ ఉండాల్సిందే. పాలు లేకుండా తయారు చేసే ఈ టీని హైదరాబాద్‌లో గవా చాయ్‌ అని కూడా పిలుస్తారు.
నీళ్లలో మిరియాల పొడి, జాజికాయ, యాలకుల పొడి, లవంగాలూ, బెల్లం వేసి డికాక్షన్‌ తయారు చేస్తారు. తాగే ముందు కాస్త నిమ్మరసం కలుపుతారు. కొన్ని చోట్ల ఖర్జూర సిరప్‌ కూడా జత చేస్తారు. బెల్లం ఈ టీకి రుచినిస్తే... సుగంధద్రవ్యాలు కమ్మటి వాసనతో ఆకట్టుకుంటాయి. అరేబియన్‌ సంస్కృతిలో భాగమైన ఈ చాయ్‌ మన దగ్గర పాతబస్తీలోని బార్కస్‌, యూకత్‌పురా ప్రాంతాల్లో గ్లాసు పదిరూపాయలకే దొరుకుతుంది.


మసాలా మలై చాయ్‌: మలై అంటే కోవా. టీనీ కోవానీ కలగలిపి చేసేదే మసాలా మలై చాయ్‌. నీళ్లలో యాలకులు, అల్లం, టీపొడి వేయాలి. డికాక్షన్‌ చిక్కగా వచ్చాక అందులో బాగా మరిగించిన పాలు, కాస్త చక్కెర చేర్చాలి. టీ బాగా మరిగాక పొయ్యి మీద నుంచి దించి కోవా వేసిన కప్పులో పోసి తిరగబోస్తే తెల్లని  నురగలతో కమ్మని మలై చాయ్‌ సిద్ధమైపోతుంది. కోవా ఉంటే ఈ నురగల చాయ్‌ని ఇంట్లోనూ ప్రయత్నించొచ్చు. పాలను మరిగించడంలోనే అసలు రుచి అనేది మర్చిపోకండి.


గ్యాస్‌, కరెంట్‌, నీళ్లు... ఏ బిల్లూ రాదు!

చెన్నైలోని కీళ్‌పాకం ప్రాంతంలో ఉండే సురేష్‌ ఇంటికి కరెంటు బిల్లు రాదు, గ్యాస్‌ బిల్లు రాదు, కూరగాయల ఖర్చూ ఉండదు, నీటి బిల్లు కూడా దాదాపు లేనట్టే. అంటే ఆ ఇంట్లో వీటిని వాడరని కాదు. కావాల్సినంత వాడుకుంటారు. కాకపోతే అందరిలా వాటిని కొనరు. ఇంట్లోనే విద్యుదుత్పత్తి చేస్తారు, వర్షం నీటిని ఒడిసి పడతారు. దేశంలోనే అత్యంత పర్యావరణ హితమైనదిగా సురేష్‌ ఇంటిని చెబుతుంటారు. ఇంతకీ ఆ ఇంటి కథ ఏంటంటే...
సురేష్‌ ఇంట్లో 11 ఫ్యాన్లు, 25 లైట్లూ, ఒక ఫ్రిజ్‌, కంప్యూటర్‌, నీటి పంపు, టీవీ, మిక్సీ, గ్రైండర్‌, ఓవెన్‌, వాషింగ్‌ మెషీన్‌, ఏసీ... విద్యుత్తుతో నడిచే ఇన్ని పరికరాలుఉన్నాయి. ఒకప్పుడు వీటికి కరెంట్‌ బిల్లు వేలల్లోనే వచ్చేది. కానీ ఎనిమిదేళ్ల నుంచి పరిస్థితి మారింది. కారణం ఆ ఇంటికి సౌర విద్యుత్‌ వచ్చింది. అప్పట్నుంచీ ఆ ఇంట్లో విద్యుత్‌ కోత అన్న మా కూడా లేదు. పూర్తిగా సౌర విద్యుత్తుతో తన ఇంటి అవసరాల్ని తీర్చుకునే సురేష్‌ని స్నేహితులూ, ఇరుగుపొరుగువాళ్లూ ‘సోలార్‌ సురేష్‌’ అని పిలుస్తుంటారు.
జర్మనీ స్ఫూర్తి
ఐఐటీ మద్రాస్‌, ఐఐఎమ్‌ అహ్మదాబాద్‌ పూర్వ విద్యార్థి అయిన సురేష్‌... ఒక వస్త్ర తయారీ సంస్థలో ఉద్యోగిగా చేరి, అందులో ఎండీ స్థాయికి ఎదిగారు. ఉద్యోగరీత్యా కొన్నేళ్ల కిందట జర్మనీ వెళ్లారు. అక్కడ ప్రతి ఇంటి మిద్దెమీదా సౌర ఫలకాలు ఉండటం చూశారాయన. తర్వాత చాలా ఏళ్లవరకూ ఆ విషయాన్ని మర్చిపోలేదు. ‘జర్మనీలో ఎండలు తక్కువయినా కూడా ఎంతో చక్కగా సౌర విద్యుత్తుని వినియోగించుకుంటే మనం ఎందుకు వినియోగించుకోకూడదన్న ఆలోచన అప్పుడే వచ్చింది’ అంటారు సురేష్‌. 2012లో రూ.2.5 లక్షలు ఖర్చుచేసి ఒక కిలోవాట్‌ ఉత్పత్తి సామర్థ్యం ఉన్న ప్యానళ్లని తన ఇంటి పైకప్పుమీద ఏర్పాటుచేశారు. విద్యుత్‌ వినియోగం తగ్గి శ్లాబ్‌ రేటు కిందకు రావడంతో దాదాపు సగం వరకూ కరెంట్‌ బిల్లు తగ్గింది. దాన్ని సున్నాకి తగ్గించాలనే లక్ష్యంతో 2015లో మరో రెండు కిలోవాట్ల సామర్థ్యం ఉన్న ప్యానెళ్లను ఏర్పాటుచేశారు. ఈసారి ఖర్చు రూ.3.2 లక్షలైంది. తర్వాత నుంచి మాత్రం ఆ ఇంటి కరెంట్‌ బిల్లు సున్నా అయింది. సౌర ఫలకాలకు యూవీ కిరణాలద్వారా అందే వెలుగు సరిపోతుంది. కాబట్టి వర్షాకాలంలోనూ విద్యుదుత్పత్తి జరుగుతుంది. నగరజీవికి అతిపెద్ద సమస్య అయిన విద్యుత్తుకి పర్యావరణ హితమైన పరిష్కారం కనుగొన్నాక ఇతర గృహ అవసరాలకూ అలాంటి మార్గం చూడాలన్న ఆలోచన వచ్చిన సురేష్‌ ఇంట్లో బయోగ్యాస్‌ ప్లాంట్‌ పెట్టారు. ఆ ఇంటి రోజువారీ అవసరాలకు సరిపడా గ్యాస్‌ ఉత్పత్తి జరగాలంటే కనీసం 3-4 కిలోల జీవ వ్యర్థాలు అవసరం. కానీ సురేష్‌ ఇంట్లో అరకేజీకి మించి వ్యర్థాలుండవు. అందుకని ఇరుగుపొరుగు నుంచీ, దగ్గర్లోని కాయగూరల వ్యాపారుల నుంచి వ్యర్థాలను సేకరిస్తారు. బయోగ్యాస్‌ ఉత్పత్తి ప్రక్రియలో కొంతమేర వ్యర్థాలు వస్తాయి. వాటిని సేంద్రియ ఎరువుగా వినియోగిస్తూ రూఫ్‌ గార్డెన్‌ని పెంచారు సురేష్‌. కొత్తిమీర, పచ్చిమిరప, టొమాటోల్లాంటివి ఆ ఇంట్లో ఏడాది పొడుగునా అందుబాటులో ఉంటాయిపుడు.

నీటినీ ఒడిసి పడతారు...
తన ఇంటి మిద్దెమీద పడిన నీటిని గొట్టాలసాయంతో రాళ్లూ, బొగ్గు, ఇసుక పొరలుగా నింపి ఉన్న ట్యాంకులోకి పంపుతారు సురేష్‌. అందులో  నీరు వడపోత అవుతుంది. దాన్ని సంపులో నిల్వ చేసుకుని ఇంటి నీటి అవసరాలు తీర్చుకుంటారు. అది నిండిపోతే బోరుబావిలోకి పంపుతారు. ప్రహరీ లోపల ఇంటిచుట్టూ పడే నీరు నేలలోకి ఇంకేలా భూమిలోకి పైపుల్నీ అమర్చారు. ఇంటిచుట్టూ వెదురు మొక్కల్ని నాటారు. అవి గుబురుగా, ఎత్తుగా పెరిగి నీడనీ పచ్చదనాన్నీ పంచుతున్నాయి. ‘మేం ఉండే కీళ్‌పాకం వాహన రద్దీ ఎక్కువగా ఉండే ప్రాంతం. కానీ నేను మేడమీదకు వెళ్తే అడవిలో ఉన్నట్టే ఉంటుంది. ఓ గంటసేపు మొక్కల మధ్య నడుస్తుంటాను. దీనివల్ల మానసిక ఉల్లాసంతోపాటు వ్యాయామం, స్వచ్ఛమైన గాలీ దొరుకుతాయి’ అంటారు సురేష్‌. 2015 తుపాను సమయంలో చెన్నై మొత్తంగా మూడు రోజులపాటు విద్యుత్‌ సరఫరాకు అంతరాయం ఏర్పడింది. ఆ సమయంలో సురేష్‌ ఇంట్లోనే అతడి స్నేహితులూ, ఇరుగుపొరుగు వాళ్లూ తమ మొబైల్‌ ఫోన్లని ఛార్జింగ్‌ చేసుకున్నారు. కొందరు నీటిని క్యాన్లలో పట్టుకువెళ్లారు. సౌర విద్యుత్తు ఇళ్లతోపాటు విద్యా, వ్యాపార సంస్థలకూ లాభదాయకమేనని ప్రచారం చేస్తూ ఎందరో అటువైపు వెళ్లేలా ప్రోత్సహించారు సురేష్‌. టీవీ, ఫ్రిజ్‌ వాషింగ్‌ మెషీన్‌, కారులానే ప్రతి ఇంటికీ సౌర విద్యుత్‌ విభాగం ఉండాలంటారీ ప్రకృతి ప్రేమికుడు.

 


 

ఇంకా..

జిల్లా వార్తలు

దేవ‌తార్చ‌న

రుచులు
+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact :
040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

For Editorial Feedback - eMail: infonet@eenadu.net
For Digital Marketing enquiries Contact : 040 -
23318181 eMail :marketing@eenadu.net
Best Viewed In Latest Browsers
Terms & Conditions   |   Privacy Policy
Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.