close

నట్టింట్లో చిట్టడవి..!

పచ్చని చెట్లనీ తోటల్నీ అడవుల్నీ చూస్తూ పరవశించిపోయే వాళ్లు కొందరైతే, వాటిని పెరట్లోనే పెంచుకోవాలని ఆశపడేవాళ్లు మరికొందరు. అయితే, కాంక్రీటు కీకారణ్యాల్లో మొక్కలకే చోటు లేదు. ఇక, వనాలెక్కడ... అనిపించడం సహజం. అందుకే అంత పెద్ద చెట్లకు చిట్టిపొట్టి రూపాన్నిచ్చి పెంచుకున్నట్లే, ఇప్పుడు పచ్చని అడవుల్నీ పెంచేస్తున్నారు. అవే... ఈ బోన్సాయ్‌ వనాలు.

ఆకులో ఆకునై పువ్వులో పువ్వునై... ఈ అడవి దాగిపోనా ఎటులైనా ఇచటనే ఆగిపోనా... అంటూ ప్రకృతిలో మమేకమయ్యాడో కవి. అవునుమరి, పచ్చని అడవుల్ని చూస్తే ఎవరికైనా పరవశమే... అందుకే పెరట్లోనూ తోటల్లోనూ మొక్కల్ని పెంచుకుంటాం. కానీ నేటి ఇరుకిరుకు ఇళ్లలో పూలమొక్కల్ని పెంచుకోవడానికే స్థలం లేక వాటిని కుండీల్లో పెంచుతున్నారు. అలాగే వేప, మామిడి వంటి పెద్ద చెట్లను కుండీల్లో పెంచుకునేవాళ్లూ ఉన్నారు. అయితే వీటిని భారీ వృక్షాల్లా కాకుండా చిన్నసైజులో పెరిగేలా చేస్తారు. అదే బోన్సాయ్‌. సహజంగా పెరిగే చెట్టుకి చిట్టిపొట్టి రూపం అన్నమాట.

ఆకాశాన్ని అందుకోవాలన్నట్లు అంత ఎత్తుకి పెరిగే ఆ చెట్లు, ఇంత చిన్న కంటెయినరులో పెరగడం చూస్తే ఎవరికైనా ఆశ్చర్యం కలుగుతుంది. బోన్సాయ్‌ పెంపకంలోని గొప్పతనం అదే. ఎంత పెద్ద చెట్టయినా కుండీలో చక్కగా కుదురుకుంటుంది. పూలు పూస్తుంది. కాయలు కాస్తుంది. అయితే ఇంతకాలం ఒక కుండీలో ఒక చెట్టుని మాత్రమే పెంచేవారు. దాని కొమ్మల్నీ ఆకుల్నీ కత్తిరిస్తూ ఏళ్లు గడుస్తున్నా మొక్క సైజు పెరగకుండా జాగ్రత్తపడేవారు. ఇప్పుడు అదే కుండీలో ఒకదానికి బదులు ఒకే రకానికి చెందిన అనేక చెట్లను గానీ భిన్న జాతులకు చెందిన చెట్లనుగానీ పెంచి అచ్చం అడవినే తలపిస్తున్నారు నేటి ఉద్యానవన ప్రియులు. పెరట్లోనో బాల్కనీలోనో కనిపించే ఆ పచ్చని అడవుల్ని చూస్తే ఇంటికొచ్చిన అతిథులు అక్కడి నుంచి కదిలితే ఒట్టు.

బోన్సాయ్‌ పెంపకం ప్రాచీనమైనది. చైనా, జపాన్‌ల నుంచే ప్రపంచదేశాలకీ విస్తరించింది. ఈ పద్ధతిలో ఏ చెట్టునైనా కోరిన సైజులో పెంచుకోవచ్చు. దీనికోసం మట్టిలో ప్యూమిస్‌, లావా రాళ్లనీ ఖనిజాలనీ కలిపి ప్రత్యేకంగా మట్టిని తయారుచేసి వాడతారు బోన్సాయ్‌ నిపుణులు. కొమ్మల్నీ వేళ్లనీ కత్తిరించేందుకు విభిన్న పరికరాల్నీ ఉపయోగిస్తారు. అడవి కోసమైతే మరిన్ని జాగ్రత్తలూ తీసుకుంటారు. కొండల్లోనో గుట్టల్లోనో కొండ అంచుల్లోనో పెరిగినట్లుగా భిన్న ఆకారాల్లోని రాళ్లని వాడి ఆ వనాన్ని అందంగా తీర్చిదిద్దుతారు. కొన్ని చెట్లకి కాండం నిట్టనిలువుగా పైకి ఉంటుంది. మరికొన్ని కొమ్మలతో శాఖోపశాఖలుగా విస్తరిస్తాయి. కాబట్టి చెట్టుని బట్టి అడవి అందం మారుతుంటుంది. దాంతో నచ్చిన చెట్లతో అడవుల్ని పెంచేస్తున్నారు బోన్సాయ్‌ ప్రియులు.

మొత్తమ్మీద ఇరుకు ఇళ్లలోనూ చెట్లను పెంచుకోవాలనుకునేవాళ్లకి ఈ బోన్సాయ్‌ వనాలు, అటు అందాన్నీ ఇటు ఆహ్లాదాన్నీ అందిస్తాయనడంలో సందేహం లేదు.


మోదీ మెచ్చిన... తిరునావాయా తామర!

ఆలయానికి వెళ్లి నిండు మనసుతో దేవుడిని కొలుస్తాం. పూలూపండ్లూ అర్పించి కోరిన కోరికలను తీర్చమంటూ వేడుకుంటాం. పూజాకార్యక్రమాల్లో పూలది  ఇంత విశిష్ట స్థానం కనుకనే ఎంతో మంది రైతులు పూలసాగును ఉపాధిగా ఎంచుకుని ఆదాయాన్ని ఆర్జిస్తున్నారు. అలాగే కేరళ రాష్ట్రంలోని ఓ గ్రామానికి చెందిన ముస్లింలు తామర పూల సాగును చేపట్టి, వాటిని ఆలయాలకు సరఫరా చేస్తూ ప్రత్యేకత చాటుకుంటున్నారు.

కేరళ రాష్ట్రంలోని మలప్పురం జిల్లా తిరునావాయా గ్రామంలో ఎక్కువగా నివసించేది ముస్లిం కుటుంబాలే. ఇదే గ్రామ శివారులో నవముకుంద అనే విష్ణు ఆలయం ఉంది. వివిధ ప్రాంతాల నుంచి ఆ ఆలయానికి వచ్చే భక్తులు విష్ణువుకు ప్రీతిపాత్రమైన తామర పూలూ, దండలూ సమర్పిస్తూ పూజలు చేస్తుంటే, అర్చకులు వాటితో ఆలయాన్ని అలంకరిస్తుండేవారు. ఆ గ్రామ ముస్లింలు తిరునావాయా చుట్టుపక్కలున్న చెరువుల్లోంచి తామర పూలను సేకరించి ఆలయం వద్ద భక్తులకూ, అర్చకులకూ విక్రయిస్తుండేవారు. అయితే, వేసవిలో నీరు లేక చాలా సార్లు పూలకు కొరత ఏర్పడేది. దీంతో వారు మోటార్లతో తమ వ్యవసాయ భూముల్లో నీటిని నింపి వాటినే కొలనులుగా మార్చేశారు. అందులో తామర విత్తనాలు చల్లి తామర సాగును ప్రారంభించారు.
ఏ కాలంలోనైనా ఈ పూలు దొరుకుతాయన్న ఉద్దేశంతో పలు ప్రాంతాల్లోని ఆలయాల నిర్వాహకులూ, వ్యాపారులూ, భక్తులూ తిరునావాయాకు వచ్చి కొనుగోలు చేయసాగారు. అలా తామర పూలకోసం వచ్చే వారి సంఖ్య ఏటేటా పెరగడంతో అక్కడి ముస్లింలు వాటినే గత యాభై ఏళ్లుగా సాగుచేస్తూ పలు ప్రాంతాల్లోని ఆలయాలకు చేరవేస్తున్నారు.

పదిహేను వందల ఎకరాల్లో...
తిరునావాయా గ్రామానికి చెందిన ముస్లింలు ప్రస్తుతం పదిహేను వందల ఎకరాల విస్తీర్ణంలో తామర పూలను సాగు చేస్తున్నారు. గ్రామశివారులోని చెరువుల్లో ఓ వైపు సాగుచేస్తూనే మరోవైపు వీటికోసం తమ సొంత భూములనూ, లీజుకు తీసుకున్న స్థలాలనూ కొలనులుగా మార్చడం గమనార్హం. వీటి సాగు కోసం విత్తనాలను కొనుగోలు చేసి చెరువుల్లోనూ, కొలనుల్లోనూ చల్లుతారు. విత్తనాలు చల్లిన తరవాత మూడు నెలల నుంచీ నాలుగు నెలలలోపు పూలు చేతికొస్తాయి. వీటిని తిరుచ్చూరు, గురువాయూర్‌తోపాటు చెన్నై, బెంగళూరు, కోయంబత్తూర్‌లోని ప్రధాన ఆలయాలకూ, అక్కడి వ్యాపారులకూ సరఫరా చేస్తున్నారు. రోజూ ఏడు వేల నుంచీ ఎనిమిది వేల పూలను ప్రత్యేక వాహనాల్లో ఆయా ప్రాంతాలకు తరలిస్తున్నారు. ప్రధానంగా తిరుచ్చూరు, గురువాయూర్‌ ప్రాంతాల్లోని అర్చకులు తిరునావాయా గ్రామ ముస్లింలు పంపించిన తామర పూలతోనే ఆలయాలను అలంకరించి పూజాకార్యక్రమాలు నిర్వహిస్తారు.

ప్రధాని ప్రశంసలు
ప్రధానిగా రెండోసారి ఎన్నికైన సందర్భంగా నరేంద్రమోదీ గురువాయూర్‌లోని శ్రీకృష్ణ ఆలయాన్ని సందర్శించి పూజలు చేశారు. ఆ సమయంలో... తిరునావాయాలో సాగుచేసిన తామర పూలతోనే మోదీకి అర్చకులు తులాభారం నిర్వహించారు. హిందువుల పూజలూ, ఆలయాల అలంకరణ కోసం తామర పూలను సాగుచేస్తున్న ఆ గ్రామ ముస్లింలను ప్రధాని మోదీ ప్రత్యేకంగా ప్రశంసించారు కూడా. ఒక్కో పువ్వును రెండు రూపాయల నుంచీ అయిదు రూపాయల వరకూ విక్రయిస్తున్న ముస్లింలు ప్రతి నెలా సుమారు రూ.30 వేలు సంపాదిస్తున్నారు. వీరు తామర సాగుతో లాభాలను పొందుతూనే పూలు తెంపడం, మాలలను అల్లడంలాంటి పనులను అప్పగిస్తూ నిరుద్యోగులకు ఉపాధి కల్పిస్తున్నారు. తిరునావాయాలో సాగైన తామర పూలను భక్తులూ, అర్చకులూ ఎంతో ఇష్టంగా కొనుగోలు చేస్తారనీ, తాము సాగు చేసిన పూలు దైవసన్నిధికి చేరడం ఎంతో ఆనందంగా ఉంటుందనీ చెబుతారు ఆ గ్రామ ముస్లింలు.

ఇంకా..

జిల్లా వార్తలు

దేవ‌తార్చ‌న

రుచులు
+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers
Terms & Conditions   |   Privacy Policy
Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.