సమస్యలు పరిష్కరించాలని భైఠాయింపు

మహబూబ్‌నగర్‌, వనపర్తి, ఈనాడు డిజిటల్‌: మంత్రులు ఎర్రబెల్లి దయాకర్‌రావు, నిరంజన్‌రెడ్డి, శ్రీనివాస్‌గౌడ్‌లకు సర్పంచుల ఆందోళన సెగ తాకింది. మహబూబ్‌నగర్‌లో శనివారం నిర్వహించిన పంచాయతీరాజ్‌ సమ్మేళనానికి వారు ముఖ్య అతిథులుగా హాజరు కాగా సర్పంచులు వారి సమస్యలను పరిష్కరించాలని వేదిక ముందు భైఠాయించడంతో గందరగోళానికి దారి తీసింది. తమ డిమాండ్లను పరిష్కరించాలని కోరుతూ మహబూబ్‌నగర్‌ జిల్లా సర్పంచులు శనివారం ‘చలో పాలమూరు’ కార్యక్రమానికి పిలుపునిచ్చారు. ఈ క్రమంలో సర్పంచులు తొలుత బస్టాండ్‌ వద్ద అంబేడ్కర్‌ విగ్రహానికి పూలమాలలు వేసి అనంతరం ర్యాలీగా సమ్మేళనం నిర్వహిస్తున్న మహబూబ్‌నగర్‌ శివారులోని ఓ ఫంక్షన్‌హాల్‌ వద్దకు వచ్చి దారిపై బైఠాయించారు. మంత్రి శ్రీనివాస్‌గౌడ్‌, ఎమ్మెల్యేలు లక్ష్మారెడ్డి, వెంకటేశ్వర్‌రెడ్డి ఆందోళన విరమించాలని వారికి నచ్చచెప్పినా ఫలితం లేకపోయింది. ఒక దశలో ఏం చేయాలో తోచక వేదికపై మంత్రులు మౌనంగా ఉండిపోయారు.  సర్పంచుల సంక్షేమ సంఘం మహబూబ్‌నగర్‌ జిల్లా అధ్యక్షుడు ప్రణీల్‌చందర్‌ వేదికపైకి వెళ్లి సర్పంచుల ఇబ్బందులు ఏకరవు పెట్టారు. సమస్యలు తీర్చేందుకు కృషి చేస్తాననిఎర్రబెల్లి హామీ ఇచ్చారు.