హాంకాంగ్‌: వరుస పరాజయాలతో సతమతమవుతున్న భారత స్టార్‌ షట్లర్‌ సైనా నెహ్వాల్‌కు మరోసారి పరాభవం ఎదురైంది. గతవారం చైనా ఓపెన్‌లో తొలి రౌండ్‌లోనే ఇంటిదారి పట్టిన సైనా.. తాజాగా జరుగుతున్న హాంకాంగ్‌ ఓపెన్‌ సూపర్‌ 500 బ్యాడ్మింటన్‌ టోర్నీలోనూ నిరాశపర్చింది. బుధవారం జరిగిన తొలి రౌండ్‌లో 9వ సీడ్‌ సైనా 13-21, 20-22తో  చైనా క్రీడాకారిణి కాయ్‌ యాన్‌ యాన్‌ చేతిలో ఒడిపోయింది. 

కేవలం 30 నిమిషాల్లోనే సైనా ప్రత్యర్థి ముందు తలవంచింది. తొలి గేమ్‌లో కాయ్‌ యాన్‌ యాన్‌ దూకుడు ముందు తేలిపోయిన సైనా.. ఆ తర్వాత రెండో గేమ్‌లో గట్టిపోటీ ఇచ్చింది. అయినప్పటికీ ఫలితం లభించలేదు. కాగా, గతవారం జరిగిన చైనా ఓపెన్‌లోనూ సైనా ఇదే క్రీడాకారిణి చేతిలోనే ఓటమి చవిచూసింది. 

ఈ సీజన్‌ ఆరంభంలో దూకుడు ప్రదర్శించిన సైనా.. ఆ తర్వాత వరుస పరాజయాలతో సతమతమవుతోంది. సైనా ఇలా తొలి రౌండ్‌లోనే టోర్నీ నుంచి నిష్క్రమించడం ఈ సీజన్‌లో ఇది 8వ సారి కావడం గమనార్హం.