అనారోగ్యంలో.. ఆర్థిక ధీమా

ఓవైపు జీవనశైలి జబ్బులు, మరోవైపు ఇప్పటికే ఉన్న సీజనల్‌ వ్యాధులు.. వీటిని మించి ఇప్పుడు కరోనా.. అనారోగ్యం ఎటునుంచి వచ్చి కాటేస్తుందో తెలియని పరిస్థితి. ఆసుపత్రిలో చేరి, చికిత్స చేయించుకోవాలంటే.. రూ.లక్షల్లోనే వ్యయం అవుతుంది. ఇలాంటి పరిస్థితుల్లో మనం ఏం చేయాలి? ఆరోగ్య బీమా పాలసీ తీసుకుంటే.. కొంతలో కొంత ధీమా లభిస్తుంది. అయితే, పాలసీ ఎంపికలో చిన్న పొరపాటు చేసినా.. ఆశించిన ఫలితం మాత్రం అందదు.
ఆసుపత్రిలో చేరినప్పుడే కాకుండా.. సంబంధిత వైద్య ఖర్చులు, పరీక్షలకూ పాలసీ పరిహారాన్ని ఇవ్వాలి. వైద్య ద్రవ్యోల్బణం ఎప్పటికప్పుడు పెరిగిపోతోంది. కాబట్టి, మీరు పాలసీ తీసుకునేటప్పుడు ఈ విషయాన్నీ దృష్టిలో పెట్టుకొని, తగిన మొత్తాన్ని నిర్ణయించుకోవాలి. వైద్య చికిత్సలు, ఆసుపత్రి ఖర్చులకు అనుగుణంగా ఆ మొత్తం ఉండాలి. వేటికి వర్తిస్తుంది?
మీరు తీసుకున్న పాలసీ అన్ని రకాల చికిత్సలకూ పరిహారం వస్తుందా? మినహాయింపులేమైనా ఉన్నాయా చూసుకోండి. వేచి ఉండే వ్యవధి ఎంత? ముందస్తు వ్యాధుల చికిత్స సంగతేమిటి? రోజువారీ చికిత్సలకు పరిహారం లభిస్తుందా? ప్రసూతి ఖర్చులను ఇస్తారా?ఇలాంటివన్నీ ముందుగానే అడిగి తెలుసుకోండి. మీరు కచ్చితంగా పరిహారం వస్తుందని అనుకున్నప్పుడు.. ఇవ్వకపోతే ఆందోళన తప్పదు.
* ఉప పరిమితులున్నాయా?
మీ ఆరోగ్య బీమా పాలసీలో ఏమైనా ఉప పరిమితులు ఉన్నాయా ముందే చూసుకోండి. కొన్నిసార్లు కొన్ని వ్యాధుల చికిత్సలకు మొత్తం ఖర్చును చెల్లించకపోవచ్చు. ఇలా ఉప పరిమితులతో ఉండే పాలసీని ఎంచుకున్నప్పుడు పాలసీదారుడి జేబుపై భారం పడుతుంది. ఇలాంటివి ఉంటే ముందే వాటి గురించి తెలుసుకోవడం మేలు. పాలసీ తీసుకునేటప్పుడు వ్యాధుల చికిత్సలకు ఎలాంటి పరిమితులూ ఉండకుండా.. పాలసీలో ఉన్న మొత్తాన్ని ఇచ్చేలా ఉండాలి.
* ఐసీయూలో చికిత్సకు..
ఆసుపత్రిలో చేరినప్పుడు ఖర్చుల మీద నియంత్రణ ఉండదు. కొన్నిసార్లు అన్నీ బాగున్నట్లే అనిపించినా.. పరిస్థితులు విషమించి, ఐసీయూ చికిత్స వరకూ వెళ్లవచ్చు. ఇలాంటప్పుడు ఐసీయూ అద్దెపై పరిమితి ఉంటే.. అది ఆర్థికంగా భారమైనట్లే. పాలసీని ఎంచుకునేటప్పుడు ఒకటికి రెండు పాలసీలను పోల్చి చూసుకోండి. ఆ తర్వాతే నిర్ణయం తీసుకోండి.
*ఎన్నిసార్లు క్లెయిం చేసినా..
ఒకసారి ఆసుపత్రిలో చేరినప్పుడు పాలసీ మొత్తం ఖర్చయిపోయింది.. మరోసారి ఏదైనా వ్యాధికి ఆసుపత్రిలో చేరితే ఎలా? మీరు పాలసీ తీసుకునేటప్పుడే ఈ విషయాన్ని ఆలోచించాలి. ఒకసారి పాలసీ మొత్తం పూర్తయితే.. వెంటనే మరోసారి ఆ పాలసీ విలువ 100శాతానికి చేరుకోవాలి. ఇలాంటి పాలసీల అవసరమే ఇప్పుడు ఎక్కువగా ఉందని గుర్తుంచుకోండి.
* నగదు రహితంగా..
క్లెయిం కోసం వెళ్లినప్పుడు నగదు రహితం, పరిష్కారంలో వేగం ఉన్న పాలసీలకే ప్రాధాన్యం ఇవ్వాలి. బీమా సంస్థ చెల్లింపుల చరిత్ర ఇక్కడ ప్రధానం. పూర్తిగా డిజిటల్‌లోనే క్లెయింలను పరిష్కరించే సంస్థల పాలసీలకు ఇప్పుడు ప్రాధాన్యం పెరిగింది. అదే సమయంలో బీమా సంస్థకున్న నెట్‌వర్క్‌ ఆసుపత్రుల జాబితాను పరిశీలించండి. మీ ఇంటికి సమీపంలో ఉన్నవీ, పేరున్న ఆసుపత్రులు ఉన్నాయా చూసుకోండి.
* తీవ్ర వ్యాధులకూ..
కేన్సర్‌, గుండె జబ్బులు, మధుమేహంలాంటివి ఇప్పుడు బాగా పెరిగాయి. వీటన్నింటికీ వర్తించేలా క్రిటికల్‌ ఇల్‌నెస్‌ కవర్‌తో ఆరోగ్య బీమా పాలసీలను ఎంచుకోవాలి. అయితే, దీనికి కొంత మొత్తం అదనంగా చెల్లించాల్సి రావచ్చు. మీరు ఆ ప్రీమియాన్ని భరించగలరా లేదా చూసుకొని, దీన్ని ఎంచుకోవాలి.
వీటన్నింటితోపాటు.. పాలసీని క్లెయిం చేసుకోనప్పుడు బోనస్‌ ఎంత ఇస్తారు? ఆరోగ్యాన్ని కాపాడుకునే వారికి ఇచ్చే అదనపు ప్రయోజనాలేమిటి?కుటుంబానికి అంతటికీ సరిపోతుందా లేదా? అనే అంశాల ఆధారంగా పాలసీని ఎంచుకోవాలి. అప్పుడే ఆ పాలసీ మీకు అన్ని విధాలుగా భరోసానిస్తుంది.

- ప్రసూన్‌సిక్దర్‌, ఎండీ-సీఈఓ, మణిపాల్‌సిగ్నా హెల్త్‌ ఇన్సూరెన్స్‌.

Tags :

మరిన్ని

జిల్లా వార్తలు

చదువు సుఖీభవ మకరందం ఈతరం ఆహా హాయ్ బుజ్జీ స్థిరాస్తి రుచులు దేవతార్చన

మరిన్ని

రుచులు

App