Pawan kalyan: జీతాలు, పింఛన్లు ఏవి? ఆదాయం ఎటుపోతోంది?: పవన్‌

తాజా వార్తలు

Published : 09/10/2021 02:13 IST

Pawan kalyan: జీతాలు, పింఛన్లు ఏవి? ఆదాయం ఎటుపోతోంది?: పవన్‌

అమరావతి: వైకాపా ప్రభుత్వంపై జనసేన అధినేత పవన్‌ కల్యాణ్‌ మరోసారి విమర్శనాస్త్రాలు సంధించారు. రాష్ట్రంలో ప్రభుత్వ ఉద్యోగులు, విశ్రాంత ఉద్యోగులకు జీతాలు, పింఛన్లు సకాలంలో చెల్లించకపోవడం ప్రభుత్వానికి లోపించిన ఆర్థిక క్రమశిక్షణను తెలియజేస్తోందని విమర్శించారు. ప్రభుత్వ ఉద్యోగులకు ఒకటో తేదీన జీతాలు వస్తాయనే మాటను మరిచిపోయే పరిస్థితికి తీసుకొచ్చారని ఆరోపించారు. ఎప్పుడు జీతాలు, పింఛన్లు వస్తాయో తెలియదని, రాష్ట్ర ప్రభుత్వ ఆర్థిక నిర్వహణ గాడి తప్పడమే ఇందుకు కారణమని ఒక ప్రకటనటలో దుయ్యబట్టారు. విశ్రాంత ప్రభుత్వ ఉద్యోగులు పింఛన్లు అందకపోవడంతో తీవ్ర ఇబ్బందులు ఎదుర్కొంటున్న విషయం తన దృష్టికి వచ్చిందన్నారు. దశాబ్దాలపాటు సర్వీసు చేశాక విశ్రాంత జీవితాన్ని ప్రశాంతంగా గడపాలనుకకొంటారని... వృద్ధాప్యంలో వారికి వైద్య ఖర్చులు ఎక్కువగా ఉంటాయన్నారు. ఆ ఖర్చులకు పింఛను డబ్బులే ఆధారమని, వాటిని కూడా సకాలంలో ఇవ్వకపోతే మానసిక వేదనకు లోనవుతారని పేర్కొన్నారు.  

ఉద్యోగులు, విశ్రాంత ఉద్యోగుల కష్టాలు తనకు తెలుసునని.. జీతం, పింఛనుతో ఆత్మాభిమానంతో జీవిస్తారని అన్నారు. ఉద్యోగులు తమకు వచ్చే జీతాన్ని ప్రణాళికతో ఖర్చు చేసుకుంటారని, బ్యాంకు రుణాల వాయిదాలు, పిల్లల చదువుల ఖర్చులు, వైద్య అవసరాలు.. ఎన్నో ఉంటాయన్నారు. నిర్దేశిత సమయానికి జీతం ఇవ్వకపోతే ఎంతకాలం వారు చేబదుళ్లతో నెట్టుకురావాలని ప్రశ్నించారు. పోలీసు సిబ్బంది నిరంతరం విధుల్లో ఉంటారని, వారికి  11 నెలల నుంచి టీఏ చెల్లించడంలేదని, వారి సరెండర్‌ లీవులకు రావాల్సిన సొమ్ములు ఇవ్వలేదన్నారు. పోలీసులు ఎదుర్కొంటున్న ఇబ్బందులు తన దృష్టికి రావడంతోనే అనంతపురం జిల్లా కొత్తచెరువు సభలో ప్రస్తావించానన్నారు. ప్రభుత్వ ఉద్యోగులకు ఇప్పటి వరకు 7 డీఏలు బకాయిపడిందని, పీఆర్‌సీ అమలు చేయడం లేదని పేర్కొన్నారు. జీతం ఇవ్వడం ఆలస్యం చేస్తే  డీఏలు, టీఏలు, పీఆర్సీలు అడగరని... జీతం వస్తే అదే పదివేలు అనుకొంటారనే  ప్రభుత్వం వ్యవహరిస్తోందని ఆరోపించారు. రాష్ట్ర ప్రభుత్వానికి ప్రతి నెలా వచ్చే ఆదాయం గత ఆర్థిక సంవత్సరం కంటే పెరిగిందని లెక్కలు చెబుతున్నాయని, ప్రభుత్వ నిర్వహణలో భాగమైన జీతభత్యాల చెల్లింపులు చేయడం లేదంటే ప్రభుత్వ ఆదాయం ఎటుపోతోంది? అని పవన్‌ ప్రశ్నించారు. ప్రతి నెలా తీసుకొస్తున్న అప్పులు ఏమైపోతున్నాయని నిలదీశారు.


Advertisement

Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
జనరల్
మరిన్ని
జాతీయ- అంతర్జాతీయ
మరిన్ని