టెహ్రాన్‌: ఇరాన్‌లో మరో భారీ చమురు క్షేత్రాన్ని కనుగొన్నట్లు ఆ దేశ అధ్యక్షుడు హసన్‌ రౌహానీ ఆదివారం ప్రకటించారు. దక్షిణ ఇరాన్‌లోని ఖుజెస్థాన్‌ ప్రావిన్స్‌ ప్రాంతంలో 50 బిలియన్ బ్యారెళ్ల చమురు నిల్వలు ఉన్నట్లు ఆయన తెలిపారు. యాజ్డ్‌ నగరంలో నిర్వహించిన ఓ కార్యక్రమంలో ఆయన ప్రసంగిస్తూ ఈ విషయాన్ని వెల్లడించారు. ప్రస్తుతం లభ్యమైన చమురు నిల్వలు వాణిజ్య ఉపయోగాలకు వినియోగించవచ్చని పరిశోధకులు తెలిపారు. ఇది ఇరాన్‌లోనే అతిపెద్దదైన అహ్వజ్‌ చమురు క్షేత్రం(65బిలియన్‌ బ్యారెళ్లు) తర్వాత రెండో పెద్ద క్షేత్రం. అణు ఒప్పందం నుంచి అమెరికా వైదొలగిన అనంతరం ఇరాన్‌పై ఆంక్షలు విధించిన సంగతి తెలిసిందే. ఈ ఆంక్షలు ఉన్నప్పటికీ మరో చమురు క్షేత్రాన్ని కనుగొనడంతో ఆదేశంలో భారీ చమురు నిల్వలున్నట్లు తెలుస్తోంది.